Menawi sampun limang sasih kirang langkung nyane, Pandemi Covid-19 puniki karasayang ring panegara Indonesia. Iraga soang-soang sampun ngamargiang makudang-kudang utsaha, gumanti prasida makelid saking panglalah virus puniki. Utsaha punika, minakadi: nganggen masker ri sajroning medal saking jero paumahan soang-soang; Wenten taler sane nganggen masker maimbuh face shield; Olahraga sane teratur lan ngajeng sakancan ajeng-ajengan sane prasida nincapang imunitas angga soang-soang; rutin ngawasuh tangan nganggen sabun, ngantos medal meme ring media sosial sane kasurat cuci tangan mulu, tapi kagak disuruh makan ; lan utsaha-utsaha sane tiosan gumanti prasida nguredang panglalah virus covid-19. Cutet nyane iraga sareng sami, sampun mautsaha lan pateh ngaptiang gumanti pandemi puniki prasida gelis matilar. Asapunika taler, iraga soang-soang madrebe pikobet sane mabina-binayan ring anake sane tiosan. Inggih sasuratan puniki wantah daging pikayunan titiang newek. Unek-unek sane rasayang titiang ri sajeroning masan pandemi. Ring Yogyakarta titiang ngalintangin masan pandemi puniki. Pedidi , doh saking rerama lan kaluwarga titiange. Wastan titiang Dek Uya. Titiang puniki mahasisya sane polih galah ngalanturang masekolah ring silih tunggil perguruan tinggi ring Yogyakarta. Sampun tigang warsa lamin nyane titiang magenah ring Yogyakarta. Titiang nongos ring panepi Kali Code, silih tunggil tukad sane kasub ring Yogyakarta, limbak santukan utsaha dane Romo Mangunwijaya. Salami tigang warsa titiang nongos ring kota pelajar puniki, sampun akeh suka duka sane rasayang titiang. Pandemi Covid-19 silih tunggil pikobet sane taler rasayang titiang iriki ring Yogyakarta, Indayang ja sareng rasayang, kengken mirib rasane ngalintangin masan pandemi ring gumin anak? Kengken mirib nuturang rasa inguh titiang dipet pradene inget teken rerama lan kaluwarga? Sawalik nyane, kengken mirib nyapnyap reraman titiange, ngenehang titiang driki padidian di gumin anak ring masan pandemi? Sebet, jejeh, maimbuh inguh paling. Ento ane rasayang titiang daweg pandemi virus covid-19 nglalahin ring sakancan wawidangan panegara Indonesia, rauhing D.I.Y. Yogyakarta. Ortine indik virus Covid-19 sayan lami sayan limbak, tur ngancan jejeh yening piarsayang. Bina ring jagat medsos sane ramya antuk orti-orti indik pandemi, jagat Yogyakartane pramangkin suwung mangmung. Sebet titiang manggihin tukang becak sane nenten polih penumpang nyang asiki; Sebet titiang manggihin loper korann sane nenten wenten sane numbasin; dagang jamu beras kencur taler suwung; akeh malih yening tuturang titiang. Bina ring dagang empon-empon, sakadi: jae, kunyit, sere, temulawak, msl, jeg lais maseluk anake matumbasan. Sekat gumine keni pandemi, sakancan soroh empon-empon buka garangin anake numbas. Titiang taler sareng maseluk numbas empon-empon ring pasar. Sekat wenten mrana Covid-19, wau titiang tatas uning binane ja teken isen. Duhh, belog titiange kaliwat Med, inguh, punika sane rasayang titiang ri sajeroning pandemi Covid-19. Tusing nyidang kija-kija. Akeh rurunge sane ka-lockdown, maportal, tusing nyidang montore liwat. Saha kajaga olih para wargine. Tusing nyidaang titiang pesu sakita keneh buka biasane. Napi malih montor titiange kari ngangge plat polisi Bali, DK, biih jeg curenge Sepi taler karasayang Tusing nyidang kacunduk sareng timpal-timpal, sane biasa panggihin ring kampus, utawi nongkrong bareng ring warung kopi. Sasukat pandemi Covid-19, nenten wenten timpale sane kayun iring titiang matemu. Makejang jerih, masekeb ring genah soang-soang. Ada mirib masih an majangkut ngajak gagelan nyane. Duhhhh, nyen ane tusing nau buka kaketo, titiang taler dot Sakewala lacur titiang durung madrebe gagelan, nyen lakar ajak majangkut? Legu, buyung? Kanggoang sepine jangkutin, sambilang ningeh embahan toya tukad Codene. Sayub-sayub tembang campur sari Didi Kempot piragi titiang saking doh. Wis ambyar, lara sing tak rasake, kowe ninggal aku neng kene Neng opo kowe tego nyikso aku neng kene ...Duhh, dewa ratu tembange punika mawinan sayan ambyar manah titiange. Inggih, ambyar sane rasane rasayang titiang ri sajeroning pandemi Covid-19 puniki. Sebet Matimpal Aget asapunika anake nuturang. Punika mawinan para lingsire ngelingang gumanti nenten kaliwat girang yening manggihin suka, tungalik nyane nenten kaliwat sebet yening dukane kapanggih. Kaden wenten kasurat ring gaguritan Tamtam, catur bekel titiang pasti suka,duka,lara,pati nika wantah titiang tikul .. Inggih titiang mawasta Dek Uya, boya I Tamtam. Yukti sakadi baos geguritanne punika kawentenan urip manusane. Yadiastun pandemi puniki ngawinan inguh tan kadi, akeh taler aget sane rasayang titiang. Silih tunggil nyane ri sajeroning paridabdab titiang bimbingan tesis. Yening masan normal, titiang kacunduk langsung sareng supervisor titiang ring kampus. Meweh pisan dane ruruh titiang, santukan dan kalintang sibuk. Sering taler dane matilar ka dura negara, Belanda, lan sapangrauh dane nenten keni antuk. Duh, wantah sabar bekelin titiang. Bina ring masan covid sakadi mangkin. Proses bimbingan kamargiang majalaran antuk e-mail. Pamargi sakadi puniki yukti-yukti ngawinan dangan para mahasisya. Nenten repot malih mahasisyane rauh ka kampus, taler nenten perlu malih ngeprint. Indayang ja kenehang, akuda prabeyane telas anggen ngeprint tesis? Tond n biin coretan supervisor titiange, nenten keni antuk titiang ngawacen. Sakadi tulisan dokter Yadiastun danganan malih akidik, proses bimbingan via e-mail boya ja nguredang kasuksman utawi bobot bimbingan. Akeh masukan supervisor titiang sane mabuat ri sajroning bimbingan by e-mail. Sakewanten masukan-masukan punika, nenten prasida sami dagingin titiang. Santukan abot pisan titiang ngarereh literature. Nguda keto? Kaden liu ada perpustakaan di Jogja? Inggih wantah patut sakadi punika, sakewanten santukan pandemi Covid-19 puniki, makasami perpustakan ring Jogja matutup. Tetap stay di Jogja mas Kadek, sebentar lagi tesismu bisa saya acc untuk diujikan , Asapunika orti saking supervisor titiang. Duh lega manah titiang Orti puniki prasida nguredang rasa inguh titiang ulian pandemi. Kenten taler prasida ngicalang rasa nyapnyap rerama lan kaluwarga titiang ring Bali. Ortine punika saha nincapang imun tubuh titiang lan reraman titiang . Inggih, yadiastun wenten Pand mi Covid-19 titiang prasida muputang tesis. Sidang tesis titiang kamargiang daring antuk media google meet. Yadiastun online, pamargin sidang yukti-yukti ngawinan tegang. Makasami panguji ngamedalang sarang-saran sane kalintang mabuat. Akeh paradigma baru sane prasida panggihin titiang saking saran-saran masukan dewan penguji. Tesis titiange nenten ja prasida puput, yening nenten sangkaning olas asing, pitulung, lan dukungan reraman titiang, kaluwarga titiang, supervisor titiang, lan orang-orang istimewa tiosan sane nenten prasida baosang driki. Dumadak ja tesis titiange wenten kawigunan nyane lan prasida kalimbakang malih Malih siki, titiang boya ja tamat sangkaning covid lulusan covid. Brangti manah titiang yening wenten anak maosang sakadi asapunika. Mekeneh nyagur bungutne Sebet dong taler wenten. Covid-19 ngawinan nenten wenten timpal-timpal titiange sane prasida ngarauhin sidang titiang. Wantah pangarastiti saking grup wa. Timpal titiange manawi uning ring rasa sebet sane rasayang titiang. Punika mawinan timpal-timpal titiang ngirim hadiah sidang via jasa kurir, marupa: buah kurma, baju kaos, buku, lan kenang-kenangan sane tiosan.. Suksma timpal-timpal antuk hadiah nyane Titiang taler inguh sujati nyane sane mangkin. Kalawat-lawat antuk titiang napi ambil pakaryanne ri sampun puput kuliah puniki. Napi kantun wenten lowongan pakaryan ring masan gerit sakadi puniki? Aget titiang madrebe rerama, sane ngedeang bayun titiange. Dane mituturin titiang,gumanti indik punika nenten be keliwatan kenehang. Akeh sane prasida kakaryanin, sampunang patah semangat tetap berkarya, lan eda engsap ngrastiti ring Hyang Widhi lan lelangit asapunika pabesen reraman titiang makakalih. Titiang taler masuluh ring tukang becak, tukang sayur, dagang angkringan, dagang krupuk, loper koran, pengamen, penjaja susu murni keliling, lan sane tiosan. Yadiastun abot sane rasayang dane, dane makasami tetep mautsaha. Gusti mboten sare, mirib nika sangu urip sanegemel dane, ngalintangin kauripann puniki Toh nguda, titiang ane aget polih masekolah, ngelah keneh buku kakene? Duh, nduk setonden masiat, nirdon asan dadi cucu veteran kenten titiang ngedekin padewekan. . Sane mangkin Yogyakarta sampun sayan-sayan ramya. Ring masan new normal puniki, sampun akeh montor pasliwer ring margine.. Rurung-rurung tusing buin kajaga, suba wadih mirib ngitungan ane kaketo. Sakancan toko suba pada mabuka. Pedagang kaki lima ring Malioboro taler akeh sane sampun ngawit ngagahang lapak nyane. Dagang soto, dagang cap-cay, dagang bakmi, dagang ronde, langganan titiange taler sampun ngawit medagang. Cafe-cafe genah muda-mudine nongkrong taler pada mabuka. Perpustakaan sami taler mabuka, antuk paridabdab sane nganutin standard pencegahan Covid-19. Maimbuh sepeda gayung, pit, duh pasliwer ring margine. Cenik-kelih tua-bajang, makejang pada demen masepedanan. Tusing dagang krupuk dagang cilok pemulung dogen jani masepedanan. Mapunduh, marerod sapedane ring margin. Toko-toko sepeda masih ramya, ojoh anak sane arsa matumbasan Punika ngawinan pangargan sapedane sane mangkin jeg dewa ratuu Titiang taler sareng keni aab masepedanan punika. Pit utawi sepeda jengki bapak kos wantah sane adokang titiang. Alon-alon titiang mamargi saking kos, ngalintangin Tugu Jogja, Malioboro, Pasar Bringharjo, Istana Presiden, Titik Nol, Sonobudoyo, Alun-Alun Lor, Masjid Kauman, Kraton, Taman Sari, Siti Hinggil, Alun-Alun Kidul, Plengkung Nirbaya Gading, Benteng Wetan, Kota Baru, ngantos mawali malih ka genah kos titiang. Wantah sepeda jwngki anggen titiang nguluh margine, mamargi sareng sepeda-sepeda keren tiosan. Minab kadene titiang tukang krupuk dagang cilok Asapunika taler mangkin ring masa new normal puniki, titiang prasida kacunduk malih sareng timpal-timpal titiange. Makedekan saha nuturang aget sebet ane karasayang soang-soang, maimbuh ghibah Inggih asapunika wantah daging pikayunan titiang. Napi sane rasayang titiang, janten mabinayan sareng napi sane kasarayang anake sane tiosan. Punika mawinan, curhat punika mabuat pisan anggen ngamedalang unek-unek pikayunan. Nah, sayembara sakadi kamargiang olih BASAbali WIKI puniki taler mabuat, anggen ngamedalang daging pikayunan. Menawi sane mangkin sasuratan sakadi puniki wantah dados papeson unek-unek. Sakewanten pungkuran, sasuratan sakadi puniki prasida dados memori historis. Iraga sami pastika pateh ngaptiang dumadak pandemi puniki prasida gelis matilar saking Ibu Pertiwi. Dumogi pandemi puniki prasida anggen sasuluh, sane ngawinan iraga eling malih ring kasujatianne dados manusa jati. Iraga wantah damuh sane nenten wenten arti nyane ring ajeng Ida Sang Hyang Parama Kawi. Sampunang sumbung, congkak, pangkah, ngulurin indria, tur ngusak-asik karasmian Ibu Pertiwi. Selalu ada hikmah, di balik bencana Yogyakarta, 09 Juli 2020
Enable comment auto-refresher