Foto-Ulian Virus Corona Tiang Luntang-Lantung Buka Cicing Berung-Made Damar

Year

Related Places

Writer(s)

Photographer(s)

Reference

087750211201

Photo Credit

Video Credit

Enable comment auto-refresher

Description

In English

⏤

In Balinese

Ulian Virus Corona, idup tiange luntang-lantung. Mulih ka kampung, tiang buka katundung. Mulih ka umah bajang, masih patuh jeg jejehina, buina misi kena denda. Mula sebet pesan keneh tiange yen tuturang ulian panglalah Virus Coronane. Ulian ada viruse ene, kurenan tiange ane magae di hotel mareren magae, cara bahasa Indonesiane orahanga dirumahkan. Dumadak ja sing nglantas kena PHK. Uli sekat ento, kurenan tiange ngajak tiang lan pianak-pianak tiange mulih ka kampung, ka umah kurenan tiange. Keneh kurenan tiange lakar di kampung malu ngoyong sambilang maabian, keto masih nyidaang nulungin reramanne magarapan di carike. Ngudiang men nongos di kost di rantauan, suba tusing magae, suba sing maan gajih. Aget masih tuan rumah ane ngelahang kose ngamaang mayah sewaane atengana. Neked di kampung, kulawargan tiange bagia krana nepukin tiang, kurenan, muah pianak tiange mulih seger oger. Sinah rasa bagia mapupul buin ngajak kulawarga sing nyidaang baan nyambatang. Nanging bagiane ento tuah akejep. Ulian kramane maan nepukin kurenan tiange ngarit ka carik sanjana ento, jeg saget iur ortane di desa. Petengne, prajuru desane teka mulih tiange, ngorahin apang kulawargan tiange makarantina malu di jumah duang minggu, tusing dadi pesu. Baos prajuru desane beneh lan luung pesan, ento lakar jalanang tiang, Apang pada-pada rahayu ngajak nyama, pisaga, muah krama desa ane lenan. Buin maninne, jeg kebus kuping tiange ningehang pakrimik pisagane, kurenan tiange kone bisa ngaba virus ulian magae di pariwisata. Di media sosial, liu tepukin status kramane buka nyindir kulawargan tiange. Tumben mulih kampung kenehe linglung, kanti masare sing luung. Bli, buin mani semeng atehang tiang ka umah bajang ngajak panak-panake maka telu. Inguh bayun tiange bli, buka cicing berung karasayang padewekan i raga ulian viruse ene. Jag dadi omongan pisaga. Luungan i raga ngalah apang sing nglantas dadi iyeg mani puan Keto tiang masadu ngajak kurenan tiange petengne ento ulian inguh kenehe sing nyidang masare ngenehang pakrimik pisagane di sisi. Kangen nepukin pianake ane nu cerik-cerik buka telu suba padaa ngengkis masare, buin manine lakar ajak buin luas ka umah bajang tiange, apang idongan ningeh pakrimik ane boya-boya. Buin mani semenganne tiang lan pianak tiange pagrenot payu atehanga ka umah bajang tiange negakin sepeda motor. Tiang sing ngelah mobil, tuah ento Arta Brama ane satia sesai ngatehang kulawargan tiange kemu-mai. Semu matuan tiange maka dadua sedih pesan ningalin pajalan tiange luas. Sebet ane karasayang prajani ilang disubane tiang neked di umah bajang tiange. Memen tiange nyagjagin tiang, lantas nyangkil panak tiange ane paling cerika. Tiang sing nyaritayang teken reraman tiange, unduk apa ane makada tiang mulih dinane ento. Tiang muah pianak tiange nyek lakar nongos malu di umah bajang tiange nyang abulan kanti viruse seken-seken ilang. Dinane ento kurenan tiange malipetan ka tongose ngkos, makeneh ngalih gae serabutan apang ada tambahan, krana suba sing luung kenehne yen buin malipetan nongos di kampung ulian pakrimik desane. Petengne, Satgas Penanggulangan Covid-19 patroli ka umah-umah kramane, keto masih ka umah tiange. Tusing ada nyet apa-apa di kenehe, tau-tau tiang orahina enggal-enggal magedi, krana di desan tiange tusing dadi matamiu. Tiang ane suba nganten, pakidih ngajak anak muani ka dura desa, jani suba madan krama tamiu. Tiang lantas edengina awig-awig unduk penanggulangan Covid-19 ento. Baca tiang, mula saja krama desane tusing dadi nrima krama tamiu. Ane dadi seselin tiang, ngudiang memen tiange tusing ngorahang uli itunian, satonden kurenan tiange mabalik ka kos? Buin baca tiang awig-awige ento, misi matulis, yen ada krama tamiu ane mamaksa matamiu alemeng, lakar kena denda satak tali rupiah. Apa buin maimbuh tawanga kurenan tiange magae di pariwisata, ngancam tangar Tim Satgase ditu. Tiang orahina enggal-enggal magedi apang sing ngae panglalah Virus Corona . Mimih, sebet pesan keneh tiange dugasne ento, prajani tiang ngabarin kurenan tiange lewat WA, apang nyemput tiang buin mani semengne, aget masih nu ngelah kuota. Ulian Covid-19, mulih ka umah bajang dogen madenda satak tali rupiah, kalud sing bekelina pipis nyang aketeng teken kurenane. Aget masih memen tiange ngelah sesepelan abesik, memen tiange malu ane mayahin dendan tiange ento. Seken-seken buka cicing berung karasayang padewekan tiange, kija-kija kena tundung. Sebete tusing nyidang nanggehang, sing taen nyak luung masare di petengne. Sing suud-suud tiang ngrastiti sareng Widhine mangda kaicen pamargi sane becik, keto masih nunas ica apang Virus Corona ane ngae grubug ene enggal ilang. Buin manine, kurenan tiange teka lakar nyemput tiang, mara enceg suba ngenjuhin tiang pipis satak tali rupiah anggo mayah denda. Pedalem pesan nepukin kurenan tiange cagcag-cigcig, luntang-lantung kemu mai ngalih tongos ngoyong. Tiang tusing nakonang lakar ajaka kija, tiang suba pasrah, ane pentiang pianake maan tongos masare, tiang sing peduli buin yen ada pisagane ngomong ane tidong-tidong teken kulawargan tiange. Jeg kal tebelang kopinge. Sing karasa, tiang lan pianak-pianake suba ajaka ka bukit-bukite teken kurenan tiange. Di kubu ane maraab baan ambengan ento, kurenan tiange mareren. Kanggoang jani dini malu nongos Luh, Apang idongan kebus kupinge. Jani iraga suba suud dadi cicing berung ane kemu mai kena tundung. Ene tanah carik beline ulian ngontrak, uli pidan beli mula ngengkebang, sing taen maorahan teken iluh. Reraman beline masih tonden orahin beli, lek atin beline, tanah baan ngontrak bakat tuturang. Ento ane sedang numbeg, ane ngarit padang, makejang timpal-timpal beline ane ajak magae. I pidan bareng-bareng ajak ngontrak tanah dini. Jani bareng-bareng masih kanggoang ajak nongos dini sambilang mabian. Tenang jani dini luh, kewala kanggoang kubu maraab ambengan nanging pasti ngae tis masare. Keto masih kanggoang kubune tonden misi WC, nyanan mandus semere, ada klebutan Ning delodne, yehne masih dadi langsung inum. Keto kurenan tiange mamunyi disubane neked di tongose ento. Prajani ngembeng yeh paningalan tiange. Dong suba ja, ulian virus i raga keweh mapupul ngajak kulawarga. Nanging bayun tiange prajani gede, jengah lakar magae. Panak-panak tiange aget masih nyak pada degeng. Kurenan tiange masih seleg pesan magarapan. Jagung muah selane ane pulane ipidan, jani suba sedeng pupu. Sabilang wai kulawargan tiange madaar jagung lan sela. Kanggoang anggon nasi sela, dikenkene lablab, dikenkene kuskus, dikenkene tambus, dikenkene goreng, ane penting basange tusing puyung. Lakar jukut masih aluh ngempok. Apang maan pipis, tiang lantas madagang kripik sela. Tiang ane ngae, panake ane keluhan masih seleg nulungin, kurenan tiange ane Maan tugas ngaba ka warung-warung. Sueca masih Widhine, yadiastun ulian madagang kripik sela, kapah-kapah ngadep masih jagung muah juku-jukut, sing kanti kulawargan tiange makenta. Keto masih pangaptin titiange sareng sameton sami, yadiastun kari wenten Virus Corona, sampunang takut. Ngiring margiang swakarma sane prasida kamargian Protokol Kesehatan patut tetep margiang, sane kicalan pakaryan, ngiring mautsaha, napi ja punika utsahane. Sane penting madasar dhrama. Yening sampun kayun mautsaha pastika mapikolih. Sampunang kalintang milih-milih pakaryan dumun ring kawentenan jagate sakadi puniki, sampunang kemad. Sampunang wantah naktakang tangan nunas wantuan, nunas bansos, nunas BLT. Yening ten polih, jeg uyut ring media sosial. Nenten becik kadi punika. Sampunang cah-cauh nyobyahang gatra hoax. Yening manahang titiang, gatra-gatrane punika sane sereman sareng viruse. Dumogi ja viruse puniki gelis ical, gelis pralina saking jagate. Dumogi sametone sami kenak rahayu, nenten wenten ngrasayang cicing berung keni tundung kadi caritan titiange i wawu. Punika sami sangkaning kramane tangar, sami jejeh, takut keni Virus Corona. Nenten wenten sane patut kaiwangang, pemerintah iraga, prajuru desa, tim medis, miwah sane tiosan pastika sampun makarya sane pinih becik. Minab puniki sangkaning Rta Buana. Ngiring mrana puniki anggen nyiksik bulu, anggen mlajahang dewek, mangda prasida sayan ngamecikang kauripane ka pungkur wekas. Ri sampune viruse sampun jakti-jakti Ical, irika iraga malih mapupul sareng kulawarga, mapupul manyama braya, mecikang karma, saling nunas iwang, saling ngampurayang. Titiang taler nenten malih mangetang raos pakrimik pisagane sane dumun-dumun. Minab titiang sujatinne jakti-jakti iwang. Ampurayang titiang i katunan. Matur suksma.

In Indonesian

⏤