Be Beno

20220912T050417626Z062675.jpg
Location
Event
Dictionary words


    You are not allowed to post comments.

    Summary



    In English

    In Balinese

    Kacerita ada anak muani madan I Nyoman Jater, ngelah kurenan madan I Blenjo. Kaceritayang I Blenjo ento anak bocok, maimbuh belog, sakewala tusing pesan ia taen nyak ngakuin dewekne belog. I Nyoman Jater tuah mamacul, sadina-dina ia magae di umane, I Blenjo nengokin ka uma sambilanga ngabaang dedaaran. Sai-sai keto dogen daaran nasine, kanti suba wadih I Nyoman Jater naar pesan tlengis teken jukut don ubi maroroban. Kacerita jani, I Nyoman Jater suud matekap, lantas ia nampedang sampinne paek ka pasisi. Dugese ento ada tukang jaring tokal muah be bano mara ngasisiang jukung. I Nyoman Jater milu ngedengang jukung laut ngosongang ka sisi. Di subane pada suud ngosong jukung, I Nyoman Jater upahina be bano aukud. Kacerita suba jani neked jumahne, tengkejut I Blenjo, Mimih, to lakar anggon gena Cai ngaba lelipi mulih? Kutang enggalang, icang sing bani keto raosne I Blenjo. Kedek ngakak I Nyoman Jater ningehang munyinne I Blenjo. Ne sajan jlema bega, ne dong ja lelipi, be bano adanne. Kema lablab anggon be kuah, awak ka uma jani buin, I Nyoman Jater tumuli majalan ka uma. I Blenjo ka paon ngendihang api, nglantas nungguhang payuk. Jemaka be banone pulanga di payuke. Mara jujukanga ngliwat menek bene atugel. Jlempanganga, masi tusing sedeng di payukne. Dadi keweh I Blenjo, sawireh payukne tuara sedeng anggona nglablab be bano. Lantas nyigcig ia ka pisagane lakar nyilih payuk. Wih Memen Wayan, Meme ngelah payuk lantang? Baang icang nyilih lakar anggon nglablab be bano keto munyine I Blenjo. Meme sing ngelah payuk lantang. Ento ada ja payuk panyukutan di paon, kema ja anggon keto raos pisaganne. Ka paon I Blenjo, makejang payuke balinina, tur makejang rasanga tusing bakal ada ane sedeng anggon nglablab be banone, lantas ia ngomong kene, Meme Wayan, icang buung nyilih payuk memenne, makejang sing ada sedeng. Buin I Blenjo ka umah pisaganne badauhne. Meme Nengah, meme ngelah payuk lantang, baang ja icang nyilih keto abetne I Blenjo. Aduh dadi soleh asanne, dija meme ngalih payuk lantang? Meme tuah ngelah payuk bunter, to di paon, silih ja lamun kanggoang Nyai keto raos pisaganne. Ngencolang I Blenjo ka paon milihin payuk. Dadi makejang karasayang tusing nyandang be banone macelep. Buin maidehan ia matetegar nyilih payuk lantang, sakewala tusing pesan ia maan. Jani, suba ia mulih. Sawireh suba kenyel mailehan nyilih payuk tusing mapikolih, be banone buin kagantung di apit-apite kalahina ka umah meten, tur malingkuh sirep masaput tebel sada gruguh-gruguh. Kacerita jani, teka Nyoman Jater uli di umane dapetanga be banone enu magantung. Beh, nguda enu masi magantung be banone? keto kenehne, laut makaukan, Wih Blenjo, ne dadi depin Nyai be banone, kaden tunden icang nglablab, anggon be makuah? Ngudiang kali jani enu medem? Masaut I Blenjo uli di pedeman, munyine ngejer ngetor sada ngruguh. Awak icange kebus dingin, tendas icange sakit tuara kodag baan naanang, keto pasaut kurenane. Sawireh I Nyoman Jater anak mula sadudarma, mendep kone ia naanang basang seduk tur gedeg. Jani padidi nungguhang payuk, ngendihang api, ngracik basa, nyemak talenan, sibaka be banone lantas tugel-tugela, pulanga di payuke. I Blenjo bangun uli di pedemane, ia ngintip uli di bolongan temboke, tepukina I Nyoman Jater ngolah be bano kanti maclempung di payuk jukute. Ngon I Blenjo tur ngrimik, Ih to ketoanga bene, o to sibak-sibaka, to buin tugel-tugela, mara cemplunganga di payuke. Ene awake malah ja maileh-ileh nyilih payuk lantang? Nah jani suba tawang carane, keto I Blenjo laut buin ia medem. Kacerita I Nyoman Jater nglablab be di paon, suba kone mulang basa. Beh malipuk jaen bonne, kanti endusa ban I Blenjo. Nah suba lebeng kuah be banone, lantas I Nyoman Jater mulihan nanjenin I Blenjo nasi, Njo, Njo Dong bangun malu lawanin madaar nah Jemakanga nasi Masaut I Blenjo, Basang icange seneb, tegarang jemakang abedik dogen I Nyoman jater nyemakang nasi acawan tur kuahina, baanga I Blenjo. I Blenjo bangun, laut nyicipin. Mara tawanga asan kuah banone jaen gati, ditu ia makaukan sada ngejer munyinne. Ne bes enceh, kuangan nasi. Buin jemakanga nasi ban I Nyoman Jater. Lantas aduk-aduka ban I Blenjo, buin ia makaukan, Aduh ne bes padetan, jangin kuah bin abedik Buin I Nyoman Jater ngsinin kuah. I Blenjo laut ngadukang nasinne, buin orahanga bes anyutan. I Nyoman Jater buin nyemakang nasi kanti apiring bek pamuput ia naar nasi misi kuah be bano. Di kenehne I Blenjo ngadakang I Nyoman Jater apang enggal luas ka uma, apang enggal ia buin nyidang nyemak nasi. Kacerita I Nyoman Jater suba suud madaar, nyemak ia tambah laut luas ka uma. Mara ilid tundunne, I Blenjo ngencolang bangun tur ka paon nyemak nasi misi kuah be bano. Baan jaen kuh bene, lantas lablaba isin kuahe, laut jambala kanti telah kayang kuahne. Suba telah, lantas payuke pantiganga di jalikane kanti belah. Nah suba lantasan sanja, teka I Nyoman Jater uli umane, laut ia ka paon nyemak nasi. Mara okana nyemak be makuah, dapetanga payuk kuahe suba belah. I Nyoman Jater matakon teken kurenane, Njo dadi belah payuke? . Ngregeh I Blenjo nyautin, I busan kuluke makerah di paon . Men dadi sing ulah? keto I Nyoman Jater nglanturang. Kaling ke icang ngulah kuluk, awak icange kebus dingin, keto I Blenjo nglanturang. Lantas maklieng kone Nyoman Jater kanggoanga uyah lengis dogen daaranga nasi. Gelisang satua, di Pura Desa lakar karya buin telun, I Nyoman Jater gantine maan giliran ngayah. Orahina teken kliane I Nyoman Jater apanga mesuang kekenan pelas, laut ia morahan teken I Blenjo, Wih Njo, awake buin mani tundena ngayah tur mesuang kekenan pelas enyuhan a bungkul, Nyai bisa ngae pelas? Bisa, batek ngaput pelas gampang pelas mapaiasan, keto sautne I Blenjo. I Nyoman Jater ka Pura ngayah nglantas makemit. I Blenjo inceg jani ngalih don tlujungan pitung papah laut nyakcak bawang jae muah kunyit ulian apaso lantas nyemak nyuh abungkul laut polesa aji basanne, lantas kaputa aji don tlujungan, suba keto mara kuskusa. Uli mara jumun lingsire baana nguskus kanti maka peteng buin makalemah kanti limang pesel nelahang saang masi tonden nyak gebuh pelase. Kacerita suba semengan, teka I Nyoman Jater, mabuaka mulih bakal nyemak papeson pelas lakar serahanga ka pura. Lantas matakon I Nyoman Jater, Njo encen pelase? Ne pelase, beli. Kema suba aba ka pura serahang jani Lantas pesu I Nyoman Jater, ka pura nyerahang pepeson marupa pelas mawadah sok, kaserahang teken klian saren. Mara ungkabina sokne, nyebeng i pesaren ningalin pangaput pelase laut gagaha. Ditu laut pesarene kedek ngakak, Ha, ha, ha Jero Pesaren mai ja malu tingalin, rne pelas papesonne Nyoman Jater. Kene pagaen kurenan I Nyoman Jatere, ene nyuh bungkulan kaputa aji don tlujungan. Pasriak krama pesarene ngrunyung pada nelokin pelasne I Nyoman Jater. Makejang pada kedek mabriagan. Kanti barak biing muane I Nyoman Jater kedekina baana maserah pelas aji nyuh bungkulan. Kliane nunden nglipetang pelase ento. Kabatek baan jengahne I Nyoman Jater, enggal ia mulih nyuun pelasne ento. Sasubane neked jumah, dapetanga I Blenjo sedekan negak di undage laut timpuga teken I Nyoman Jater aji pelas mawadah sok, kena tendasne I Blenjo laut bah ngaseksek papetengan. Meh ada apakpakan base makelone, mara buin inget I Blenjo laut ngeling goargoar. Ditu pisaganne makejang pagrudug nengokin. Kacerita buin di Pura Desa jani ngunggahang sekar. Suba kanti tengah lemeng suud kone ngunggahang sekar nglantas krama pemaksan muah desane pada nampah celeng, ada ane seleg nglawar nyiagayang sangun seka gong. Kacerita I Nyoman Jater, sawireh ia saya taun kapaica palaba tendas celeng. Lantas mulih I Nyoman Jater negen tendas celenge ento. Suba neked jumahne, kaukina I Blenjo. Njo, Njo, ene jani olah tendas celenge, gaenang basa gede malu. Suba keto lantas lablab nyen anggon kuah balung Icang ka pura jani buin ngayahang desa, keto munyinne I Nyoman Jater laut magedi. Kacerita I Blenjo incuh ngalih bunga jepun, bunga mitir, bunga bunga ratna, kanti a sok ia maan ngalih bunga. Lantas alihanga carang delima ane tuh. Duinne pacek-pacekina bungane mawarnawarni. Luung ngenahne maonggar, ada anggona gegempolan, ada tusuk-tusuka aji tali dawa. Suba keto lantas payasanga tendas celenge. Di kupingne selekina bunga maonggar, di pelengane. Kacerita jani I Nyoman Jater mara mulih uli pura. Suba kone neked jumahne, tingalina tendas celenge mapayas bek misi bunga maonggar-onggaran muah magegempolan. I Nyoman jater matakon, Blenjo, to apa dogenan garap Nyai jumah uli semengan? Masaut I Blenjo, Ento gegaen icange makepedan uli semengan icang ngalih bunga nglantas icang ngae gegempolan anggon icang mayasin tendas kebone, ne mara sih icang maan ngencegang jit. Masaut jani I Nyoman Jater, To awake nunden ngaenang basa gede, tidik payas gede gaenang tendas celenge? Masaut I Blenjo, Nah, amen keto icang ya pelih salah dingehan. Nah jani jalan ngae basa. Buin matakon I Nyoman Jater, To tunden nglablab, dadi tusing lablab? Orahang tungkul icang ngalih bunga uling semengan, jani ja jalan bareng-bareng nglablab keto munyinne I Blenjo tuara juari ngaku belog tusing bisa ngolah tenggek celeng. Buin I Nyoman Jater nungguang payuk cenik tur ngendihang api. Lantas ngracik basa rajang. Tendas celenge blulanganga, isin-isine pulanga ka payuke. Suba kanti gebuh baana nglablab, mara pulangina basa. Ditu I Blenjo bengong, tur cengah cengeh mangenang tuyuhne mailehan ngalih payuk gede. Yen tawang keneang tendas celenge i tuni ja awake bisa, keto krimikane I Blenjo. Nah suba kone lebeng reraone lantas I Blenjo ngamaluin nyemak nasi, maimbuh misi kuah balung. Lemuh ciplakane I Blenjo kanti pindo ia maimbuh nasi, enu masi kuangan.

    In Indonesian

    Nothing was added yet.