Deskripsi
Basa Inggris
Basa Bali
Sasukat wabah COVID-19 nglahlahin gumi Bali, makejang murid sekolahan tundena malajah jumah. Sakewala ane madan malajah jumah tusing ja aluh buka adanne. Malajah jumah ento nganggon biaya gede masi. Murid-muride lan reramane marasa k weh. Tiang dadi guru di sekolah ane tongosne di desa masi marase keweh. Murid-muride di desa tonden makejang ngelah HP, Komputer, utawi Laptop. Apabuin malajah uli jumah perlu akses internet ane tusing gratis. Kalingke lakar meli Komputer utawi Laptop, meliang pianakne paket data internet gen reraman murid-murid tiange nu keweh maulehan. Ulian jani alih-alihane sukeh sajan. Sawatare di pitung dina ane suba liwat, ada murid tiange ngirimin sms ngorahang paket datane suba lakar telah, reramanne dirumahkan uli tongosne magae, murid tiange ngaku tusing ngidaang buin marengin malajah lewat jaringan nganggon internet. Murid tiange ane lenan ada masi ngorahang, dugas ia nagih ngidih pipis teken reramanne anggona meli paket data, jeg prejani reramane bangras ngopak pianakne, ngorahang alih-alihane jani keweh, kadirasa pipis anggon meli baas kal jakan buin mani konden karuan ngelah. Dugas pamerintah ngumumang induk Pembelajaran lewat siaran TV, ada masi muride ngorahang tusing ngidaang nangkep siaran TV pamerintah, ane lenan ngorahang TV di jumahne usak tur ada masi ane ngaku tusing ngelah TV. Yadiastun jamanne suba maju tur Bali kasub ngantos di dura negara, nu liu masi krama Bali ane tusing ngelah TV. Jeg sebet yen tuturang. Tiang dadi guru liu masi ngelah pikobet. Yen dadi milih, luungan masuk ngajahin ka sekolah bandingan teken ngajahin online uli jumah buka jani. Paket data internet di HP ne tusing dadi puyung. Enggal sajan telah pulsane. Nyak lantas maan duman ngajahin sabilang wai, ada 5 jam pelajaran awai, ada masi kanti 8 jam pelajaran a wai, makejangne 35 jam pelajaran aminggu, jeg ngangsur angkihanne. Uli semengan tiang suba sayaga di arep layare, ngirim materi paplajahan lan tugas baang murid-muride ane enu ngidaang online. Konden buin ngae laporan ane kirim online unduk apa materi paplajahan ane baang, akuda muride ngidaang online, akuda ane sing ngidaang online, lan apa ane makada muride absen. Yen jaringan operator seluler ane anggon online tusing melah, ditu buin maan masalah gurune, lambat nyetor laporan. Tusing ja murid-muride dogen keweh, gurune masi patuh pikobetne. Yen nuju maan galah prai di Raditene, tiang maburuh ngarit padi di tongos anake manyi. Mula dasar lekad lan idup di desa uli cenik nyemak gae ngarit sabilang wai. Uli semengan majemuh ngarit padi di carike kanti tengai, suud ento mulih akejep madaar. Sawatara jam telu sanjane buin ngarit padi kanti sandikala. Kulit tiange ane suba badeng buin nyelemang. Apang ada pikolih, yadiastun abedik ane penting ngidaang meli kuota internet anggon ngajahin murid-muride. Jaman jani yen maubuhan masi keweh. Ngelah celeng lan sampi tusing ngidaang ngadep ulian sing ada nyak meli, yadiastun ajine mudah gati. Satonden wabah COVID-19 ada di Bali, celenge akilo aji selae tali rupiah, nanging jani akilo tuah aji dasa tali rupiah. Tusing cara i pidan dugas celenge ngamah dagdag, amah-amahan celenge jani makejang meli, jani liunan celeng lan sampine ngamah konsentrat ane beli aji pipis. Ngubuh bebek lan siap masi keto. I pidan taluh bebeke aji telung tali rupiah abungkul, sakewala jani telung dasa bungkul aji seket tali rupiah buina tusing ada nak meli. Satonden ada COVID-19, bebeke aukud adep aji telung benang tali rupiah, jani tuah aji setiman tali rupiah suba mael. Be siap I pidan adep aji pitulas tali a kilo, nanging jani tuah aji dasa tali a kilo. Yen adep, ajin ubuhan kaliwat mudah, yen depin tusing ngidaang kal meliang amah-amahan. Minab ene madan ngalih sampi galang bulan, ngalih bati ilang kamulan. Ngelah asil pamula-mulaan jani masi keweh maulehan. Ajin woh-wohan jani masi mudah. Satonden wabah COVID-19, memen tiange ngadep manggis a kilo aji pitulas tali kanti duangdasa tali rupiah. Nangin jani yen meli manggis aji dasa tali maan telung kilo. Pisagan tiange ane ngelah punyan duren mabuah nged masi makamen di sunduk. Pidan duren abungkul ane gede bisa aji selae tali rupiah, sakewala jani paling mael tuah aji limolas tali rupiah abungkul. Ulian sing ada anak meli, ia taen ngadep duren telung bungkul aji dasa tali rupiah. Ulian wabah COVID-19 kanti reraman tiange suud madagang canang ulian sing ada anak meli, odalan gede tusing ada jani. Kangguang jani ngae canang anggon jumah pedidi gen. Buin pidan kaden wabah COVID-19 ene lakar magedi.
Basa Indonesia
Aktifkan pemuatan ulang komentar otomatis