UPGRADE IN PROCESS - PLEASE COME BACK AT THE END OF MAY

I Kurmawa Ngambul

From BASAbaliWiki
20230228T150232136Z730874.jpg
Location
Bali
Main characters
Event
Dictionary words


    Add your comment
    BASAbaliWiki welcomes all comments. If you do not want to be anonymous, register or log in. It is free.

    Summary



    In English

    In Balinese

    Kacrita ada penyu lua muani di pasih Arnawane. Ane muani awakne selem tur mokoh madan I Kurmawa. Penyu lua kulitne masawang kuning madan Ni Kurmawi. Sadina-dina ajaka dadua ngulurin keneh neda gangge ng muah bulung ane lumlum tur samah. Keto masih soroh bene ane lenan pasliwer ngalih tetadan. Rerad rerod ngajak pianak-pianakne muah kaluwargane. Makejang soroh bene lega namtamin kamelahan pasih Arwanane. I Kurmawa muah Ni Kurmawi sedih jengah nepukin parisolah bene rerad-rerod ngajak pianak somah, pasliwer saling kepungin. I Kurmawa lantas ngomong teken somahne. Uduh adi Kurmawi, sedih keneh beline, yen nepukin nyama brayane rerad rerod ngajak pianak somah, cara anak ngewerin rasayang beli. Mula lacur beline masomah ngajak adi. Suba kudang tiban makelone beli ngajak adi ngulurin legan keneh, sakewala kayang jani tuara nyidayang numbuhang pianak, abungkul tuara ada ane lekad. Marasa kenyel adi suba mataluh, nanging kayang jani tuara ada ane lekad. Uduh beli, saja pesan buka satuan beline. Eda sanget maselselan Melahan jani jalan makaad uli dini Nah, yan keto papineh adine, jalan jani kinkinang Apa melahne dini, yadiastun tusing kuangan tetadan yang tusing ngelah pianak, precuma idupe, keto pasaut I Kurmawane. Ajaka dadua lantas majalan ngambul, ngauhang ngalih pasihe ba dauh. Mara teked di loloane tepukina buaya luh muani sedek mememan. Buayane nyapatin, munyine alus, Ih, penyu ajak dadua, lakar kija magregotan ngajang umah? Sebenge cara anak sedih pesan. Apa kasebetang? Tegarang sambatang Dumadak sida baan wake nulungin I Kurmawa masaut banban. Kene suba lacur tiange buka Widhine tusing olas teken tiang. Saja pesan buka munyin jerone, buka ngambul keneh tiange, wireh suba makelo tiang makurenan kayang jani tuara numbuhang pianak. Nyen lakar ngentinin nugtugang katurunanne kawekas? Marasa kenyel somah tiange mataluh di parangan tengah pasihe, aukud tuara ada ane lekad. Soroh bene lenan makejang suba ngadakan pianak saling paliunin. Ento ane ngawinang tiang ngambul. I Buaya kapiolasan kenehne ningeh munyin penyune buka keto. Uduh Kurmawa, eda bes sanget ngulurin sedih. Jani wake ngorahin tutur. I pidan wake masih maan buka keto, makelo tusing ngelah katurunan. Kema mai mataluh di loloane, aukud tuara ada lekad. Ditu lantas wake nunas ica ring Betara. Saking teleb nunas ica, lantas rauh Batara Surya ngicenin panugrahan. Wake apanga suud mataluh di tengah yehe, wake kapangandikayang apanga mataluh di pasisi. Uli ditu wake ngiringang pangandikan Batara Suryane. Ane jani wake suba liu numbuhang pianak. Jani Kurmawa Kurmawi ajak dadua apang pageh ngastiti Ida Batara Surya

    I Kurmawa muah Ni Kurmawi lantas ngungsi parangane ngenjor di tengah pasihe. Ditu lantas ia nunas ica ngastiti Batara. Ajaka dadua kukuh, pageh kenehne ngastawa Batara Surya. Yen kudang dina suba makelone ngrestiti, rauh Ida Batara Surya di arepan goane. Uduh cening Kurmawa Kurmawi, bengong nira ngeton kapagehan ceninge ngastiti nira. Nira suba nawang buat tetujon ceninge. Uli makelo cening suba marasa sedih, sawireh tuara sida numbuhang pianak. Dini ditu mataluh, di parangan tengah pasihe, sakewala abungkul tuara ada ane lekad. Ane jani Nira ngorahin cening, sing sida baan Nira lakar nulungin, yen cening enu mataluh di parangan tengah pasihe. Ento ada bias di sisin pasihe, melah pesan tongos ceninge mataluh. Yen suba masane mataluh, bisaang awak ceninge nyujur biase di pasisi. Ditu cening ngalih tongos melah Gaenang awake bangbang tongos mataluh. Yen suba suud mataluh, ingetang bangbange urugin, apang tusing ada anak nawang. Sesubane suud ngurugin bangbange lautang cening buin ngungsi tengah pasihe. Nira lakar setata nyunarin tur ngamertanin taluh ceninge. Da ja sangsaya keto pangandikan Ida Batara Surya. I Kurmawa muah Ni Kurmawi, kenehne lega lantas matur. Inggih Ratu Batara, ngawit saking mangkin rauh kawekas titiang pacang mataluh ring biase sane wenten ring sisin segarane. Titiang dahat nyuksmemayang pasuecan Batara. Mogi-mogi titiang sida numbuhang sentana, sakadi soroh ulame sane tiosan. Suud ia matur, Batara Surya gelis musna. Yen kudang dina suba makelone ia maan panugrahan Batara, Ni Kurmawi marasa dewekne lakar mataluh, lantas ngomong teken somahne. Beli Kurmawa ene suba masanne tiang lakar mataluh. Jani jalan ka pasisi buka pangandikan Batara Surya. Dumadak prasida buka pangaptine, taluhe pada engsah. Ditu I Kurmawa ngateh somahne ka pasisi. Teked di pasisi Ni Kurmawi nylisib ngalih tongos melah. Suba pragat ngae bangbang ngenggalang ia mataluh tur kaurugin. Suud mataluh, ia ajaka dadua mawali ka tengah pasihe. Yen kudang dina suba makelone ia mataluh, saking pasuecan Ida Batara Surya nyunarin taluhne, dadi lekad pianakne. Makejang ngrepe ngalih reramane. Lega pesan keneh I Kurmawa muah Ni Kurmawi nepukin pianakne pasliab saling kepung. Ceritayang suba pada kelih, truna, pianakne tur suba nyandang mapakurenan. I Kurmawa muah Ni Kurmawi nuturin pianak-pianakne makejang, buat pasuecan Ida Batara Surya. Makejang tuara bani tulak ngiringang pangandikan Batara. Ento makrana kayang jani penyune mataluh di pasisi.

    In Indonesian

    Nothing was added yet.