How to reduce plastic waste from religious ceremonies? Post your comments here or propose a question.

I Langgana

20220625T124155834Z045320.png
Location
Main characters
Event
Dictionary words


    Add your comment
    BASAbaliWiki welcomes all comments. If you do not want to be anonymous, register or log in. It is free.

    Summary



    In English

    In Balinese

    Dugas pidan ada anak muani ubuh madan I Langgana. Sadina-dina ia ngalih saang di tukade. Idupne bas kaliwat lacur. Ulian tiwasne ento makrana tusing ada anak nyak matimpal ngajak I Langgana. Ento ane makada ia tusing ngelah sawitra ane sujati. Yadin buka keto, kacerita ada Pan Cening ane ngolasin. Sesai Pan Cening nuturin buka I Langgana cara nuturin panakne padidi. Umahne uug maglanturan, tur meraab sumi ane suba lube bolong-bolong. Tembok umahne polpolan tur manatah tanah legit, maimbuh bet mentik padang teki dini ditu. Yen masan ujan, sinah umahne tuduhan makrana I Langgana ujanan. Yen masan endang ngentak-ngentak aine, ia kebusan. Yadin buka keto, ia merasa rena nongos ditu. Sawireh umahne ento tuah tetamian anak lingsirne uli nguni, tetep ia marasa bagia yadin tusing ngelah arta brana. Penyengker umahne malakar aji turus lumbung tur majepit aji tiing tali. Ditu di meten ane tuduh ento I Langgana masare bes kaliwat tuyuhne maburuh uli semengan. Nahanang seduk basang, makenta uli semengan, ento makara bayunne enduk lesu. Kacerita ne jani, maan lantas I Langgana ngipi soleh. Di pangipian marawat ia karauhin antuk Ida Dukuh. Aduh Cening Sang Langgana. Ne jani ada pituduh bapane teken Cening. Di tebenan natah Ceninge ada tetamian anak lingsir ane malu matanem ditu. Tetamian, marupa emas, mirah muah sarwa ratna ane kalintang utama. Sasubane ia enten di pasirepan, nglejat ia bangun, jeg nglantas I Langgana makecos nyemak saplar tur linggis anggona numbeg tur mongpong tanah. Ojoga kone tebane ane bet misi padang dogenan. Ditu lantas tumbega tanahe ento sambilanga ngalihin tetamian merupa emas muah mirah ane ipianga. Makelo suba ia numbeg, tusing masi ada bakatanga tetamian ane satuanga teken I Kaki Dukuh di pangipian. Buin kone lantas ia makisid numbeg, tur tusing masi ada tepukina tetamiane ento. Kacerita jani, nuju Pan Cening kema ke teban I Langganane, jeg makesiab Pan Cening nepukin unduke ento, lantas ia matakon, Wih Langgana, dadi telah pongpong Cai tanahe ento? Masaut I Langgana, Kene Pa. Tiang maan ngipi karauhin ban I Kaki Dukuh, tur ngandikain tiang pang numbeg tanahe di teba. Dini kone ada tetamian anak lingsir ane pidan marupa emas mirah muah sarwa ratna . Men jani suba bakat Cai mirahe ento? Tusing Pa, jeg sing ada apa, pocol tiang numbegin tanahe dini, keto I Langgana masaut. Pan Cening lantas nuturin I Langgana. Nah to ipian tuah tain pedeman, sing sedeng pa iraga lakar ngugu. Mara katuturin keto, jengah bayun I Langganane lantas ia mesaut, Aduh Pa, ipian tiange ento jeg pasti seken-seken ada. Sawireh tiang marasa keto, pastika ada tetamian anak lingsire nguni matanem dini. Buin matakon Pan Cening, Men ane jani kar kengken? Tiang lakar buin numbeg kanti bakatang tiang emas, mirah, muah ratnane ento. Disubane ngraos buka keto, buin I Langgana numbeg. Telah tanah di tebane tumbega, buin dini buin ditu, sakewala tusing masi bakatanga tetamian anak lingsirne ento. Kacerita suba kanti kenyel ia numbeg tebanne, mareren ia di beten punyan nyambune. Teka buin Pan Cening tur ia matakon, Kengken Langgana, suba bakatang emas muah mirah tetamian anak lingsire? Nguntul I Langgana baan jengah tur sebet kenehne. Maimbuh lek ulian tusing bakatanga emas muah mirahe ento. Jani kengkenang abete madaya, telah suba tanahe matumbeg tusing deweke maan apa-apa. Aduh Pa, tusing ada apa dini. Jani kengkenang tiang madaya, jeg pocol tiang numbeg kanti kenyel. Nah da suba ento sangetanga, jani paling melah aliang bibit kacang, tabia, lan tomat, tanah ane tumbeg ento Tanemin lantasan bibite ento Ubuhin tur piara ia kanti gede tur pada mabuah, disubane keto mara men adep ka peken, to lantas anggon pangupa jiwa Disubane maan tutur keto uli Pan Cening, jeg prajani I Langgana nyak ngalih bibit kacang, tomat, muah tabia. Saja kerepanga mulanun tanahe ane suba linggah galgala ban I Langgana. Suba ngancan tumbuh tur tengeh-tegeh tetandurane, ditu I Langgana ngancan lega kenehne, marasa teken kenyelne numbeg lakar mapikolih. Kacerita sabilang wai ia ngebuhin, nyukutin tur nyiramin saluiring tetandurane. Ngancan seleg ia, malahan buin ngalinggahan ia numbeg tur mamulan-mulan di tanah tebanne. Sawireh suba pada mabuah tetandurane, saja lantas adepa sabilang semengan ka peken. Ditu lantas I Langgana ngelah geginan dadi petani tabia kacang-kacangan, muah tomat. Ento makrana ia nyidang munduhang pipis, kanti ia nyidang menahin umahne ane uug, madan tileh, sida baana nongosin. Suud jani ia buka senggake idupne mondong sengsara.

    In Indonesian

    Nothing was added yet.