Begawan Domia

20220622T001219667Z377509.png
Location
Bali
Event
Dictionary words


    You are not allowed to post comments.

    Summary



    In English

    In Balinese

    Kacerita dugase pidan, ada pandita sakti mapesengan Bhagawan Domia. Ida madue sisia telung diri, luire Sang Utamaniu, Sang Arunika, muah Sang Weda. Murid Idane tetelu ento kapintonin buat kapagehan muah pasubaktinne marep ring Ida Dang Guru. Kacerita mabaos Ida ring sisiane makatiga, Nah Cening sisian bapa ajak tetelu. Sawireh suba makelo Cening nunas ajah dini di pasraman, jani suba Cening madan pada wikan tur waged, suba Cening maraga duur, pantes suba ngwangun swagina suang-suang. Jani bapa lakar mapica swagina marep ken Cening ajak telu, apang kukuh ban Cening nglaksanayang Masaur Ida Sang Arunika, Sang Abimanyu, miwah Sang Weda. Singgih Ratu Bhagawan, paragayan Hyang Pramesti Guru. Wantah patut pangandikan Dang Guru, inggih titiang misadia jagi nglaksanayang sapituduh Ida . Sapunika atur sang sisia tetiga ring Ida Bhagawan Domia. Ne jani Ida mapaica swagina ring Sang Arunika, Nah Cening Sang Arunika, ne ada wiwit padi pinaka bekel Ceninge, to ada masi carik linggah, ditu nyen Cening pageh mayasa, apang kanti Idewa sida mapikolih di carik. Ingetang nyen, salami Idewa matetanduran di carike tusing pesan dadi ngidih tulung teken nak lenan, keto pawuwus Ida Bhagawan Domia ring Sang Arunika. Kacerita di subane Sang Arunika makarya di carik, suba jani tumbuh wit padine tur suba pada mawoh sada kuning-kuning, nadaksara ada ujan bales pesan mawastu toyane blabar. Sang Arunika digelis mecikin sakancan pundukan carikne ane gembid. Sabilang kabecikin, buin lancer blabar, buin embid. Kanti telah rasa winayan Ida Sang Arunika sawireh bes gedenan yeh ane nglancah tetandurn padine di carike. Ditu kone lantasan Sang Arunika ngebahang raga di pundukane ane embid, ngempelin toyane di kala wengi. Unduke ento kauningin olih Bhagawan Domia, raris Ida ngrauhin ka carik. Mabaos Ida Hyang Bhagawan, Cening, Sang Arunika. Suba mabukti kasusatyan muah kapangehan Cening ngamong geginan. Bangun Cening, sawireh Cening lascarya ngempel toya ban anggan Ceninge, uli jani Cening adanin bapa Sang Undalaka. Sawireh saja nulus paripurna kasusatyan Ceninge, Cening lakar mangguh kasukan jagat tur sidi mantra. Asing ucapang Cening bakal tuutanga ban anake. Keto panugrahan Ida Bhagawan Domia teken Sang Arunika. Kacerita ne jani, Sang Utamaniu ane kapintonin, mabaos Ida Bhagawan, Nah Cening Sang Utamaniu, swaginan Ceninge sing ja len tuah ngangonang banteng. Ne ada sampi inane, ne nyen piara apang kanti ia manakan tur sida anggon Cening nglanturang urip Ceninge. Pateh nyen cara Sang Arunika, salami Cening ngangon, sing pesan nyen dadi ngidih tulung teken anak lenan Kema lautang laksanayang Masaur Sang Utamaniu, Inggih Dang Guru, titiang sairinga ring sapituduh Dang Guru . Kacerita suba Ida Sang Utamaniu dados pangangon. Nuju Ida kluwe miwah kasatan, ngagendong Ida ngidih-idih ajeng-ajengan kema mai. Mapikolih abedik, tusing pesan ada ane katur ring dang guru. Unduke buka keto kauningin olih Ida Hyang Bhagawan, raris Ida ngandika, Cening Sang Utamaniu, yen Cening subakti teken guru, pikolih Ceninge ngidih-idih patut aturang abedik teken dang guru. Ngencolang Sang Utamaniu nyumbah nunas ampura, santukan ida marasa iwang. Buin mani semengane, buin Ida Sang Utamaniu ngagendong. Pikolihe katur ring Bhagawan Domia. Suud maturan, malih Sang Utamaniu nglanturang ngagendong kanggen pinaka upajiwa. Unduke ento, suba masi kaiwangan olih Bhagawan Domia. Loba kabaos yening ngagendong ping kalihan. Jani tusing Ida nerusang ngagendong, nuju kasatan, empehan banteng kone inum ida, disubane i godel suud manyonyo. Unduke ento kacingak ban Ida Bhagawan Domia, lantas Ida ngandika, Wih, Cening Sang Utamaniu, sayan pelih laksanan Ceninge. Empehan sampine ento tuah druen sang pandita, pelih yen Cening ngrebutin druen Dang Guru. Buin Sang Utamaniu nyumbah, nunas ampura. Buin manine, buin Sang Utamaniu ngajengang laad-laadan empehan ane meliah di monmon godele. Unduke ento patuh masi kaiwangang olih Ida Bhagawan Domia, duanuing ngrebutin godel, mapuara godele berag. Sawireh tan sida antuk Ida Sang Utamaniu naanang seduk, metu kayunnyane ngajeng getah don madori. Getah don madorine ane panes ento nyusup di panyingakan Sang Utamaniune, tur ngranang ida wuta. Grapa-grepe Ida ngereh bantenge, kanti Ida maclempung ka semere ane tuh. Kacerita ne jani suba sore, mulih bantenge padidianan. Kagiat Ida Bhagawan Domia nyingak bantenge mulih padidiana tusing kateh ban Sang Utamaniu. Jani, mailehan Bhagawan Domia ngrereh Sang Utamaniu. Benjangne semengan wawu kapanggihin di tengah semere. Sang Utamaniu nguningayang penyingakane wuta sangkaning nginum getah don madori. Kapiwelasan Ida Hyang Bhagawan nyingak Sang Utamaniu, lantas kawantu kanti sida munggah uli semere. Gelis Ida nguncarang Weda Pangusada, nambanin Sang Utamaniune. Sangkaning kasidian mantran Bhagawan Domiane, enggal penyingakan Sang Utamaniune mawali waras kadi jatimula. Ida kapaica panugrahan, tur kapastu mangda Sang Utamaniu satata anom. Ne jani, Ida Bhagawan Domia mintonin Sang Weda. Ida Sang Weda kanikayang pageh nglaksanayang swagina maratengan di parantenan. Sadina-dina Ida nyiagayang saluir rayunan sangun Ida Hyang Bhagawan. Sang Weda kaliwat pageh, tusing pesan taen lempas ring pituduh Dang Gurujati. Sawireh buka keto langgeng yasanidane, Ida Bhagawan Domia ngicenin panugrahan kawisesan weda-mantra saha kapastu, apang Ida Sang Weda betel tingal. Kaketus saking buku Pelawa Sari

    In Indonesian

    Nothing was added yet.