Be Jeleg Tresna Telaga

20220526T002802176Z094678.jpg
Location
Bali
Event
Dictionary words

    Summary



    In English

    In Balinese

    Dugas pidan ada telaga ane madan Telaga Alpasara. Kacerita telagane asri, linggah, dalem, tur yehne ening. Di sisin Telaga Alpasarane mentik saluir punyan bunga ane nedeng kembang tur mabo miik. Bungane ane layu makejang ulung ka telagane. Di tengah telagane misi punyan tunjung, kaiterin ban makudang-kudang be. Ada Be Jeleg, Be Mas, Lele, Yuyu, Udang, muah ane lenan. Kacerita jani, ada Be Jeleg manyama ajaka telu, ane madan I Gancang, I Gancing, teken I Gancung. Makatelu sing ja taen makisid uli telagane ento. Pada suka rena, seger waras ajaka tetelu. Sing ja taen nemu pakeweh, sing ja taen kuangan tetedan. Uling kudang tiban kaden suba nongos di telagane, sing ja taen nawang sebet. Nuju Sasih Katiga, kangkang kone kadanin teken anake wiku. Kala ento pragat panas makrana limuh, tusing pati ada ujan. Buk tanahe makeber. I Kekayuan nandang lara baan panase tan paujan. Tanah tegal tur umane ngempugin, tan prasida ke tandurin. Keto masi yeh di Telaga Alpasarane ngancan ngaes-ngaesan. Sawetara yeh telagane enu ada atenga bandingang teken ane maluan. Tunggak kayu ane maluan nyilem, jani suba ninggil. Lanturang satua, ditu I Gancang ngrembug mapaitungan ngajak adinne makadadua. Ngraos I Gancang kene, Cai Gancing ajak Gancung, sawireh buka kene panes gumine, sing buungan jani iraga lakar kena pakeweh. Apa mawinan, sawireh sasihe jani sasih kangkang. Telagane lakar nyat yehne. Jani kengkenang baan apang iraga nemu rahayu turin tusing nepukin pakeweh. Keneh beeline, lan jani maluin magedi uling telagane ene. Mumpung enu ada trebesan yeh membah. Lan totonan tuut Yen suba lantas teked di loloan pasihe, sing ja ada ane sedeng sengsayanin sawireh ditu sing ja taen yeh enyat . Ningeh raos I Gancang buka keto, laut masaut adinne I Gancing. Beli Gancang, beneh buka raos beline, icang sing maboya teken papineh beline. Sakewala kene, sawireh tonden madan nyat telagane, sing ja nyandang iraga sangsaya. Sawireh sing ja ada jadma ane nawang patekan ujane. Sing ja nyandang iraga sangsaya buka keto. Buin pidanan yen pet nyat telagane, ditu mara jalanang keneh beline ento Keto pesautne I Gancing. Suba keto masaut lantas masi adinne ane paling cenika I Gancung. Kene raosne, Kene Beli, icang makadadua, apa kone buin kenehang pang liu. Manut keneh icange, sing ja beneh iraga magedi uli telagane ene. Sawireh dini pelekadan icange, keto masi palekadan beline. Suba masi dini iraga nepukin tetedaan. Dini kone iraga uling cenik nganti kelih buka jani nepukin rahayu. Lantas jani, mara ada pakeweh abedik, jeg kalahin telagane ene. Nista rasane idepe yen iraga buka keto. Papa dosa kone kaucap anake ane tuara tresna teken kawitan, teken tanah palekadan. Sawireh dini icang lekad tur kelih buka jani, depang suba apang dini masi tongos icange mati. Peduman titah Ida Sang Hyang Widhi ane gamel icang. Keto kone pesautne I Gancung. Sawireh keto pasaut adin-adinne makadadua, masaut I Gancang, Yen keto buka pamunyin cai ajak dadua, icang tusing ja lempas teken tresna manyama, tur tresna kapinin tanah palekadan. Jalan pagehang mayasa nunas ica teken Ida Sang Hyang Widhi apanga Ida sueca nedunang ujan, apang ajak makejang di telagane nepukin rahayu. Di subane keto, sing ja kanti nyat yeh telagane, saget suba magrudugan gulem di langite. Sinah ne suba suecan Widhi nyalantara ngicenin damuh Idane ujan. Nah keto kaceritayang ia I Be Jeleg manyama ajaka tetelu, nyalanang tresnane manyama, setata paras paros mapaitungan, tresna teken kawitan utawi tanah palekadan, tur setata pageh meyasa. Ulian tresna tur pageh mayasa, astiti bhakti ring marep Ida Sang Hyang Widhi Wasa pamuput nemuang ane rahayu.

    Kaketus saking Kumpulan Satua kacitak olih Pelawa Sari

    In Indonesian

    Nothing was added yet.