Beras Kuning
Summary
In English
In Balinese
Kacrita Maharaja Pretu dadi ratu luih di jagate. Dane maraga darma tutur dana teken panjak. Asing-asing ane katunas olih panjake kapica olih Ida Sang Prabu. Ida setata malaksana madasar yasa kerti. Ento mawinan panjake makejang marasa bagia tur subakti teken Ida Sang prabu. Jani Maharaja Pretu nitahang panjake ngabas alas. Ida mapikayun makarya tegal carik. Panjake sumuyug ngaturang ayah. Makejang pada sregep ngaba prabot. Ada ane ngaba madik, panampad, muah pacul. Panjake pada gupuh magarapan. Tusing ngitung tuyuh mesuang peluh. Kayune kototor. Ebete ane nglikadin kaabas. Ketket muah dui-dui kagediang. Luune kapunduhang laut katunjel. Sasubane linggah maan ngabas alas, tanahe lantas karatayang. Ane lebah kaurugin, ane tegeh kasapin, mawinan dadi dangsah. Prade ada batu gede, katuludang sibarengan. Jani batune dadi dasar temuku. Yehne ane suluk di tukade kaempelin, mawanan dadi maembah ka tanahe ane linggah. Ditu panjake ngae jelinjingan muah kakalen. Man tetakehan sepat banyu muah sepat gantung tanahe rata maan embahan yeh. Tanahe ane suba tiyeb lantas gaenanga pundukan, mawanan dadi carik. Tanahe ane tusing kena embahan yeh dadi tegalan. Maharaja Pretu ngepah carik muah tegalan ane suba pragat. Makejang panjake kaicen duman. Tur ngadikayang panjake apang ngae pakubon. Tongos masayuban dinujune panes banteng muah madayuh di nuju ujan angin. Dum-duman tegal muah carike madasar sagilik saguluk, paras-paras sarpanaya, salulung sabayantaka. Mawanan panjake makejang pada lega tur jemet magarapan. Ditu ia mamula woh-wohan muah umbi-umbian. Jani, Maharaja Pretu nunas ica ring Ida Batari Sri mangda kapicayang bibit padi catur warna. Apang prasida jangkep isin gumine. Ditu panjake ngiring sang prabu nunas ica di Pura Panungun Carik. Upakarane suba pada cumawis manut Darma Pamaculan. Sasubane ngaturang ayah ada suara ngawang-ngawang kapireng uli langit. Uduh, Cening Maharaja Pretu Luih pesan parilaksanan ceninge nitahang panjak. Tur cening tusing engsap ngaturang sembah teken meme. Apang cening nawang, meme bakal mapaica bibit padi catur warna teken cening. Sakewala antosang buin abulan pitung dina, ditu meme bakal mapetin bibite teken cening. Mara keto sabdane uli langite dadi ledang pikayunan ida sang prabu. Sawireh maciri panjak idane bakal lanuh tusing kuangan pangan kinum. Panjake sayan-sayan jemet magarapan, tur tusing ngengsapang pangacine di Pura Pangulun Carik. Nemonin dina Saniscara Kliwon wuku Wariga, ditu Ida Batari Sri nguduhin kedise petang ukud apang tuun ka marcapada. Makejang kandikayang ngaturang bibit padine catur warna ring ida sang prabu. Sawireh Maharaja teleb pangastiti Ida Batari Sri. Cicit padine ane mawarna putih madan ketan. Kekeberang olih I kedis kuteh. Kelap-kelap kecerane di langite. Ngungkulin gunung ane tegeh ngalik. Ngliwatin pasih ane linggah tur dalem. Bibit padine ane mawarna madan gaga. Kekeberang olih I kedis sugem. Ngabar-abar keberane duur bukite. Kabatek baan joh tur panes langite. Mawarna ia marasa kenyel muah bedak layah. Bibit padine mawarna selem madan injin. Kakeberang olih I kedis dara. Nyamut-nyamut pakeberane duur ambune. Panes bara karandangin. Bedak layah karanggehin masan ujan. Makejang entikane malejit. Bunga-bungane nedeng kembang. Woh-wohane nedeng nged pesan mabuah. Kala ditu kedise pada teked di ajeng ida sang prabu. Laut ngaturang bibit padi paican Ida Betari Sri. Kedis kuteh matur dabdab pesan, Ratu sang prabu Punika padi mawarna putih mawasta ketan. Dados anggen sanganan pacang aturang ring ida batara. Makadi sanganan begina, muah sanganan abug. Kedis sugem matur alon pesan, Ratu sang prabu Punika mawasta gaga. Dados pula ring tegale. Tur dados anggen caru ring upakara. Sane pacang katur ring Ida Batara. Kedis dara matur aris pesan. Ratu sang prabu Puniki mawasta injin. Dados anggen tape. Sane dados anggen manisan ri kala nanding pajengan. Baremnyane dados anggen katon ri kala makarya dodol maduparka. Katung raras matur karungah-rungah. Ratu Sang Prabu titiang nunas ampura. Titiang nenten ngaturang pre. Sawireh parerene bakat eled titiang tur sampun penunang titiang. Mangkin tampuh mentik dados kunyit. Keto katuturan ane malu, awanan kayang jani tusing ada baas mawarna kuning sawireh suba dadi kunyit. Sangkala yening ngae nasi kuning patut kunyite ane anggen warna.
In Indonesian
Enable comment auto-refresher