How to reduce plastic waste from religious ceremonies? Post your comments here or propose a question.

I Alu Teken Kedis Puuh

20220928T143959217Z030228.jpg
Location
Bali
Main characters
Event
Dictionary words


    Add your comment
    BASAbaliWiki welcomes all comments. If you do not want to be anonymous, register or log in. It is free.

    Summary



    In English

    In Balinese

    Di tegalan ane linggah liu mentik sarwa tumuwuh, ada ane mabunga, ada masi ane mabuah nged. Di tegalan ento ada masi buron ane madan I Kedis Puuh, ngelah ia sebun di beten kayu bengkele ane bet ngriung. Sesai I Kedis Puuh nongos tur ngalih amahan. Sebunne ento tuah gook ane dalem tur liu misi sumi, angona panganget di masan ujan. Sakewala tongos sebunne ento di sisin tegalanne, dadi aluh anake nyeluk yen semengan wiadin sanja I Kedis Puuh ada ditu. Ento ane makada yen semengan, I Kedis Puuh ilang ngalih tetedan. Yen ngoyong di sebunne, sinah seluka ban i manusa wiadin ban burone lenan. Disubane pepekan baan ngamah, mara lantas I Kedis Puuh buin ka sebune. Yen kudang dina kaden suba mekelone I Kedis Puuh masebun ditu, tusing ada ane nyengkalen. Ento ane makada, andel kenehne teken sebunne ditu. Kacerita ada alu gede gati. Awakne masisik kasar, layahne masepak dua, siteng, tur nyejehin. Alune ento tuah alu pangumbaran, tusing ngelah sebun ane pasti. Telah sebun burone ane lenan, aliha jeg usak-asika ngawag. Yen ada sebun kedis, taluhne amaha, tur sebune benyahanga. Keto bikas alune totonan. Gelisin satua, I Alu teka ka tegale ento ngalih amah-amahan. Sawireh suba uli tengai, tusing maan buron cenik-cenik ane dadi amaha angona patanggeh layah basangne. Nuju alune ento kemu, I Kedis Puuh suba matilar uli sebunne ngalih amah-amahan. I Alu nepukin lantas sebun I Kedis Puuhe puyung tusing misi apa-apa, buina suba uli semengan kalahina. I Alu mapineh kene, Beh lacur sajan awake buka jani. Sebun kedise dini jeg tusing misi apa. Buina gook I Kedis Puuhe ene tuah sebun ane kalahina dogen. Sinah lakar mati makenta jani dini. Keto munyin I Alu pedidina, nyambatang awakne kena sengsara ulian tusing ngamah uli semengan. Naanang layah basangne, buin ia makeneh lakar magedi, sakewala suba madan tengai tepet. Ketatwane yen luas tengai tepet, bakal dadi tetadahan Sang Kala. Takut ia ngumbara, laut mamunyi, Nah, lakar tongosin jani malu gooke dini. Nyen nawang, saget jeg mulih I Kedis Puuh mai buin, ditu idewek lakar ngamah ia. Keto kone tetimbangan I Alu. Nongos ia di gooke I Kedis Puuh sambilanga ngantiang amah-amahan ane teka kema. Suba jani nyaluk sanja, mulih buin I Puuh ka sebunne sawireh suba pepek maan ngamah ngamah gandum teken jijih. Enggal-enggal I Kedis Puuh malaib, ngungsi gooke tongos ia masebun. Dapetanga jani di sisin gooke ada laad enjekan alu gede ngliwat. Basang Alu muah ikuhne malaad di tanahe. Makeneh-keneh I Kedis Puuh, Beh... ne sengkala suba jani. Sinah di tengah gooke ada I Alu ngoyong ditu. Yen macelep jani, waluya ngejot bangke, idewek lakar amaha. Kengkenang jani madaya? Keto I Kedis Puuh makaengan, sambilanga ngricikang daya, glindang glindeng ia di sisin sebune. Yen tuah saja nu ada I Alu, meh suba pesu ia uli tuni. Sawireh dapetanga tusing ada apa di tengah sebunne. Bah, pasti I Alu suba magedi uli dini. Kewala, yen enu lantas I Alu ditu, sengkala deweke. Kengken carane jani, pang Idewek nawang, ia ada di sebun deweke yata tusing? Gelisin satua enggal, maan I Kedis Puuh naya-upaya. Apang pedas nawang apa saja ada Alu apa tusing, melah suba kaukin ia jani. Yen uli tengah gooke ada munyin Alu, paling lung magedi, ngae sebun di tongose lenan. Sakewala yen gooke sepi, bani suba macelep kema. Kacerita jani, saja jerit-jerit I Kedis Puuh makaukan, Ih gook, ne icang teka jani. Yen saja cai mula satya masawitra masaut anake Cara pasumayan icange teken cai tuni semeng . I Alu ningeh munyin I Kedis Puuhe ento uli di tengah gooke, lantas ia ngarengkeng kene, Yen tusing sautin, sinah orange bogbog, nyanan jeg malaib lantas I Kedis Puuh, payu buin mekenta. Nah apang macelep ia I Kedis Puuh, lakar jeritin jani. Keto kenehne I Alu. Sawireh ia belogne bes kaliwat, jeg masaut lantas ia, Nah... icang tusing engsap teken pasemayane ituni semengan. Icang suba ne i gook sebun caine, mai macelep Disubane keto dingeha, jeg prejani I Kedis Puuh malaib sawireh ia nawang, tusing ada sebun ane bisa ngraos keto. Sinah ento munyine I Alu. Pamuputne, selamet I Kedis Puuh, buung dadi tetedan I Alu. Dadinne, ia Alu ane belog lolong, payu makenta.

    kaketus saking buku citakan Pelawa Sari

    In Indonesian

    Nothing was added yet.