TALUH APIT BATU
- Title
- TALUH APIT BATU
- Affiliation
- SMA NEGERI 1 TEJAKULA
- Regency/City
- -
- Author(s)
- Category
- General Public
- Year
- Photo Credit/Source
- Video Credit/Source
- School/Org (if applicable)
- Location
In English
In Balinese
Om swastyastu. Matur suksma antuk galah miwah genah majeng ring padewekan titiang anggen magendu wirasa ngwedarang pikayunan majeng Bapak Ibu DPD sane dahat kusumayang titiang. Bapak Ibu wakil rakyat titiang, dumogi Bapak Ibu prasida sareng-sareng mikayunin pariindikan sane jagi wedarang titiang. Unteng bebaosan titiang wantah ring dunia pendidikan. Ampurayang titiang antuk tambet titiang ngwedar napi sane rasaang titiang puniki nenten nganggen basa alus.
Sakadi ane ampun tepukin tiang di media sosial lan di lapangan, kawentenan gurune mangkin pinaka tenaga pendidik jeg cara taluh apit batu. Ten dadi keras jak murid nanging yen ten kerasin muride nyampahin. Yen ten disiplinang ne nakal-nakal sinah generasine lakar usak, nanging yen disiplinang ane nakal-nakal gurune kena kasus. Ane mangkin, dija tongos gurune apang beneh, pak bu? Napi buin silih tunggil anggota bapak ibu nyak menyerap aspirasi murid, nanging ane diserap tuah aspirasi murid ane ngae tata tertib sekolahe berubah dadi uug. Contone murid ane muani dadi mabok lantang, murid SMP apang dadi ngaba hp. Mangkin keweh gurune matindakan. Pelih bedik dadi siu cara judul lagune, pak bu. Pelih bedik jeg encak payuk jakan tiange, matingkeb, buung makudus.
Apang bapak ibu pejabat nawang, realita di lapangan yening muride baang mabok lantang kuang luung tepuk, pak. Kuang disiplin ngenahne. Napi tujuan sekolah ngae aturan sederhana sakadi mabok bawak tuah apang muride mlajah disiplin, nyak nuutin aturan-aturan ane sederhana sadereng ipun terjun ka masyarakat tur harus nuutin aturan ne lebih kompleks tur akeh aturan masyarakat nika ten tertulis. Yen ampun nyak tur bisa nuutin aturan sederhana, pasti buin pidan murid-murid ane jemet nyak nuutin aturan ne bapak ibu anggota DPD gae. Yen mangkin kadong manjaang muride, buin pidan ne keweh bapak ibu DPD, liu lakara masyarakate membangkang. Mula yakti yen mabok bawak ten ngae dueg. mabok lantang masih ten ngae belog. Nanging ane mangkin ngae murid pang nyak mlajah nuutin tata tertib, nika ne keweh, pak. Napi buin mangkin liu murid ne nglawan guru di sekolah. Ten ja mekejang, nanging degradasi etika, tata krama, lan sopan santun muride ampun joh pesan ten cara murid ne ipidan.
Kenten masih unduk murid SMP ngaba hp. Bapak Ibu yen sidang utawi rapat tiang yakin pasti ten konsen rapat, pasti main hp. Buktine wenten anggota dewan ne main judi slot waktu rapat. Yen mangkin saihang jak murid, patuh pak..bu... Murid yen baang ngaba hp pasti ten konsen mlajah. Mula tetujon dadi ngaba hp apang nyak muride ngalih sumber belajar di internet. Nanging kenyataan di lapangan len pesan, joh...joh antara ekspektasi jak realitane wahai bapak ibu pejabat DPD.. Yen ampun ngisi hp muride jeg lupa diri. Napi buin main game, pas guru masuk ke kelas pepesan gurune ten runguanga, itep ipun main game. Yen gurune main kasar, sinah kena kasus. Yen ten runguang, sinah muride sayan campah. Yen baang ngaba hp justru gurune ne keweh untuk mengawasi apang hpne ten anggona ne boya-boya.
Ane mangkin tiang nunas ajak bapak ibu pejabat, gaenang ja gurune tongos apang nyidang ngelah keberanian matindakan. Gaenang solusi, pak bu. Ampunang jeg bapak ibu sidak ke sekolah, ngilonin murid, pun seken tawang muride kenken? Pun seken tawang dadalanne muride kanti cukura teken gurune di sekolah? Yen dadi filter malu, pak mara nae bapak bertindak. Dengarkan dari dua sisi, ampunang sepihak.
Yen mula saja bapak ibu pejabat dot ngae dunia pendidikan maju, ten kenten carane, pak. Ane mangkin tegarang gaenang solusi. Kenken patutne? Apang muride nyak mlajah etika, sopan santun. Apang nyak muride mlajah disiplin nuutin aturan-aturan sederhana. Apang gurune beneh matindakan. Apang ten bedik-bedik viral, bedik-bedik gurune kena kasus. Buina oknum pejabate mesuang munyi kalo gitu jangan jadi guru . Pih jeg nglaut nglencok tiang, pak. Yakti-yakti punyah tiang dadi guru mara kene unduke, pak.
Ane mangkin tiang nunas tulung ke bapak ibu pejabat. Diolas gaenang solusi unduke niki. Kenyataan di lapangan liu murid ne membully guru, pak. Nanging gurune ten dadi ngudiang-ngudiang. Siep. Mendep. Ten dadi nglawan. Justru guru ne mendidik muride apang ten terus-terusan campah jak guru, mangkin wenten di tongose ne keweh cara taluh apit batu.
Ngiring adungang, pak. Ampunang bapak menyerap aspirasi sepihak, pincang pak. Serap keduanya apang seimbang, pak. Yen pun dua pihak kan nyak adung. Yen pun adung mara lanturang.
Kenten manten pak pejabat. Mogi bapak ibu nyak maca tulisan tiange niki. Niki mewakilkan suara-suara gurune mangkin. Aget wenten wikithon partisipasi publik. Yen tiang nulis di medsos bisa viral, kena kasus, diblokir, laporanga, matingkeb payuk jakan tiange. Yen ten tulis, kenyataanne ngae tangkahe belbelan. Suksma wikibasaBali. Tiang nunas yadiastun tulisan tiange niki bebelogan, ngidih olas apang nyak bacana ajak pejabate. Apang tawanga kenken sujatine.
Bunga bakung suba mayang, kirang langkung ampurayang. Om santih, santih, santih om.
Enable comment auto-refresher