Ada sawatara uling awuku Bapan Godogan gelem. Ia nguwon, pules di pundukan carike. Pianakne, I Kendul ane anteng nongosin, ngemang mamahan, ngurut, lan ngaenang boreh. I Kendil, pianakne paling cerik tusing taen rungu tekening bapane gelem. Ia pepes pesan magedi, malali tur mapalianan ajak timpal-timpalne. Dugas dina anu, matan aine panes nyentak, Bapan Godogan ngelurin pianak-pianakne. Cening, keto munyin Pan Godogan, angkihanne ngangseg. Bapa sayang teken cening. Kewala bapa ngrasayang tusing nugtugang tuwuh. Bapa lakar ngalahin cening. Pangidih bapa kapining cening ajak dadua apang setata asah asih asuh manyama. Bapa tusing mekelin cening warisan. Bapa tuah ngelah arta brana ane kasimpen di tengah guoke. Dum apang paturu patuh suwud ngomong keto, Pan Godogan ngemasin mati. I Kendul kalintang sebet. Ia mautsaha nanggehang yeh matane. Ia nyesel kerana marasa tuna bhakti tekening rerama. Ia marasa mautang budi tekening bapane. Nanging, I Kendil biasa dogen. Di kenehne, marawat-rawat kasugihan reramane. Liwat bulan pitung dina, I Kendul lan I Kendil ngrembug. Lan alih arta brana ane sambatanga teken i bapa keto I Kendil ngajakin beline. Arta branane ento pasti kasimpen di tengah guok sisin tukade mapan i bapa sawai kema, keto I Kendil ngomong. Sing, I Kendul nungkasin. I bapa tusing nyimpen kasugihan di tongose aluh. Arta branane ento pasti kasimpen di tongose sengkil, di bongkol gununge. I Kendil lan I Kendul maiegan. Makejang ngukuhang kenehne. Ipun ngancan mamanes, saling tungkasin. Makadua ngedengang uwat baong lan ngembungang basangne. Kwek kwek kwek Ipun saling jagurin, saling tuludin, lan saling mantigang. Kwek . Kwek .. kwek . Sangkaning leleh, ipun mareren maiegan. I Kendul ngomong tekening adine. Yen terus maruket, apa kal bakat? Lan jani matoh-tohan. Nyen ja malunan nepukin kasugihane ento, man ategen, ane kalah man asuwun. Sing seken, apake I Kendil cumpu tekening toh-tohanne ento. Ia ngenggalang makecos nuju tukad, ngalih-ngalihin arta brana. Ningalin adine makaad, I Kendul masih ngenggalang luas ka gunung. Pajalanne joh, nanggehang bedak layah, tur kenyel. Ia mareren, negtegang bayune. Buin kejepne, buin makecos. Jani suba teked di guok ane mengkeb. Ia precaya ditu tongos kasugihan bapane. Ia ngenggelang macelep ka tengah guoke. Ia tangkejut nepukin emas, selaka, lan mirah madugdug. Sangkaning rasa bagia, I Kendul ngenggalang ngalih adine ane luas ka tukade. Ia dot I Kendil apang nepukin kasugihan warisan bapane tur ngedum nganutin toh-tohanne. Teked di tukade, ia ngelurin adinne. Kendil . Kendil . Tusing ada ane nyautin. Ri kala nepukin guok, ia lantas macelep ke tengah guoke sambilanga nyambat adan adine. Kendil . Guoke srebi pesan. Punyan kayune ngilidin. Tusing ngenah uli sisi. Adeng-adeng I Kendil macelep. Duh Ia tangkejut tur jejeh. Tinglis tingalina lelipi gede ngamah godogan. Godoganne ento tusing ada len I Kendil, adinne.
Enable comment auto-refresher