I Getap
Summary
In English
In Balinese
Ada anak teruna madan I Getap. Ia adanina I Getap kerana jelema mula getap pisan. Kenehne jeg setata takut diastun tusing karuan apa ane ngranayang ia takut. Cara dugas dua bulan, I Getap tundena ngabut keladi teken memene di tegalne. Sengap paling I Getap ngentasin rurung tegale sepi, marasa ia ada anak nutugin. Sedek ia majalan, I Getap ngadek bo pengit pisan. Tusing tawanga ada bangke bikul di tengah padange bet. I Getap prajani ngengap kipekane mirib akeh ada bangke jelema ditu. Sedeng paling, nadak sara ada pongpongan nyuh ulung macepug di sisine I Getap majujuk. Jeg nyak cara punggelan sirah matane nelik. Tan kadi-kadi kesiab bayune I Getap, lantas malaib muntag-mantig pati kaplug. Buung I Getap ngalih keladi, payu maan munyi uli memene. Kacarita jani suba masan padi kuning, liu anake magae di carik pada ngulah kedis. Keto masih bapane I Getap milu ngulah kedis di carikne. Dueg pisan bapane I Getap ngae lelakut utawi patakut kedis. Lelakute ento malakar aji bungselan sumi makaput aji kain putih. Lelakute ento gantunga di muncuk papah tubuhe ane enu endep. Papahe ento masih kategul baan tali maembatan nuju rangon utawi kubune. Dadina yening tali di rangone kakedeng, sinah lelakute ane magantung di papahe lakar maangkaban. Liu anake demen ningalin lelakut bapane I Getap. Dinane ento, I Getap di jumah padidiana, meme bapane di carik ngulah kedis uli semengan nganti sanja mara mulih. I Getap uli tuni suba ngiah-ngiuh di jumahne padidiana. Dengak-dengok ia uli jumaan ngiwasin anak teka. Barane teka jeg aeng gobane. I Getap lantas ngancing jelanan umahne. Di tengah kamare ia bungkut masaput. Kenken ja kenehne adi marasa uli beten balene ada anak magoba aeng bokne magambahan. Peluh pidit I Getap ngenggalang makecog uli balene lantas malaib pesu. I Getap lantas malaib nuju carikne ngalih meme bapane. Sedek benceng ia malaib di pundukane jeg ada kain putih merupa pocong maangkaban. I Getap kesiab makraikan geleh tur takut. Awakne lemet lantas ngluluk di pundukane tur bah mapangsegan di tengah padine. Bapane I Getap ningeh munyi jelema labuh lantas nyagjagin. Tepukina pianakne pelung gobane ulian kesiab miwah takut. Prajani repot bapane ngedetin I Getap abana ka kubune. Ditu I Getap mategtegan. Suba luung bayune mara matakon bapane nguda dadi kene unduk pianakne. I Getap lantas nuturang unduke, ia takut di jumah jeg mara ka carike buin patakut pocong putih. Jengah pisan meme bapane I Getap madingehang. Kene suba cai dadi jelema kaliwat getap. Ngudiang ngenken, dini-ditu pragat takut. Buin pidan cai dadi jelema berhasil yening pragat takut. Lamun suba i raga ada di rurunge beneh, apa sih katakutin? Bengong dogen I Getap mara maan munyi uli bapane. Mula saja, i raga perlu ngelah wanen yening malaksana. Wanene ento masih makada i raga berhasil. Sakewala ingetang i raga wanen patut madasar ulian beneh utawi dharma.
In Indonesian
Enable comment auto-refresher