UPGRADE IN PROCESS - PLEASE COME BACK MID JUNE

Literature Transparansi Bantuan Covid-19: Untuk Siapa?

From BASAbaliWiki
Revision as of 07:15, 30 July 2021 by Wedayani (talk | contribs) (Created page with "{{PageSponsor}} {{Literature |Page Title id=Transparansi Bantuan Covid-19: Untuk Siapa? |Page Title=Wantuan Covid-19 sane Nyrangcang: Anggen Sira? |Description text ban=Gegina...")
(diff) ← Older revision | Latest revision (diff) | Newer revision → (diff)
0
Vote
Title (Other local language)
Photograph by
Author(s)
Reference for photograph
Subject(s)
    Reference
    Related Places
    Event
    Related scholarly work
    Reference
    Competition
    opini


    Hiimdinanta

    35 months ago
    Votes 1++
    Hii great articles and very informative

    Made.y

    35 months ago
    Votes 1++
    Saya setuju utk poin akhir yg disampaikan, pun dgn penyampaiannya saya lebih memahami yg berbahasa indonesia

    Taritayuana

    35 months ago
    Votes 0++
    by way of explanation 👏

    Bayu pangestu aw

    35 months ago
    Votes 0++
    Great article 🙌🏻
    Add your comment
    BASAbaliWiki welcomes all comments. If you do not want to be anonymous, register or log in. It is free.

    Description


    In English

    In Balinese

    Geginan parajana ring Bali mangkin sampun sayan padem. Montor sane nguni akeh pasliwer ring margi-margi, toko-toko sane satata rame, miwah toris sane akeh malancaran rahinane dumun, mangkin sahasa kasampatang baan ombak. Ri kala masa gering agung Covid-19, akeh genah pariwisata miwah sektor ekonomi alit masyarakat sane matutup, wenten taler sane bangkrut. Indike puniki nyansan abot ri kala wenten kebijakan nutup toko-toko non esensial ring masa PPKM santukan kasus Covid-19 sane ngakehang. Yening kauratiang, sektor sane kasengguh non esensial olih pemerintah punika pinaka genah anake ngrereh pangupa jiwa. Mangkin, akeh kulawarga ngrasayang kamegan santukan wangun tata titi PPKM sane sujatinnyane maguna anggen nepasin panglahlah Covid-19. Wantuan langsung tunai sane kajanjiang olih pemerintah wantah katrima olih akidik krama sane uning ring indik punika kemanten. Sakewanten sane nenten uning, pacang nyansan meweh nemonin kahanan sekadi punika. Ri kala ngawit masan gering agung Covid-19, minab akeh yowana miwah sane makarya ring pariwisata katitahang meneng ring jero soang-soang, ngaryanang utsaha maadolan utawi ngamargiang bisnis online. Ring masannyane, kahanan sakadi puniki prasida mupu. Sakewanten kasuen-suen, nenten dangan malih maadolan sekadi pangawit geringe iwawu. Mangkin, akeh sane patut kapinehang ri kala mukak usaha. Yening wantah ngendelang wantuan pemerintah, i raga pinaka krama nenten prasida ngangenang wantuan sane akeh saking pemerintah. Wantuan sane kicen olih pemerintah taler nenten ngenenin krama sane patut kicen wantuan utawi dados kasengguh nenten tepat sasaran. Ngarsaang mangda wantuan punika neked ring krama, sakewanten nenten akidik sane korupsi miwah ngutamaang kulawargannyane ngraga ri kala pendataan wantuan. Raris sapunapi?

    Saking penampen titiange pinaka generasi milenial, sapatutnyane pemerintah daerah sane jagi ngicenin sumbangan BLT ngaryanang kerjasama sareng UMKM, warung, utawi toko kelontong ring sajeroning banjar sane salanturnyane nyiagayang subsidi majeng ring kramane. Indik punika pastika kakawitin antuk survei dumun. Survei sane kalaksanayang taler sapatutnyane yukti-yukti ngenen sasaran. Saluiring KK sane sampun kadaftarang pinaka kulawarga sane keni dampak gering agung, dados magilir-giliran rauh matumbasan ring toko sane sampun kapilih utawi kaajak kerja sama ring galah sane sampun kacumawisang. Imbanyane, ring asiki banjar wenten 30 KK, sane keni dampak gering agung wenten 12 KK. Saking 12 KK puniki salanturnyane saka siki nemonin rahina sane mabinayan dados numbas kebutuhan pokok, sekadi beras, jangan, miwah taluh nganutin galah matumbasan sane sampun kacumawisang, makadi nyabran kalih rahina.

    Kebutuhan pokok punika sampun polih prabea subsidi manut ring akeh barang sane katumbas. Subsidi sane kapolihang dados mawit saking wantuan pemerintah utawi kapupulang saking sumbangan krama sane arsa mapunia pinaka wangun rasa saling asih ring krama lianan. Arah-arah indik wantuan saking pemerintah puniki taler sapatutnyane adil tur tatas. Sampunang minayang kawentenan warga pendatang miwah warga asli ri kala ngicenin wantuan, santukan kahanan gering agung puniki karasayang olih makasami kramane, nenten ja wantah warga asli kemanten, nenten taler warga pendatang kemanten. Sapunika taler tata cara milih sang sane polih wantuan sosial patut jelas. Kriteria sane kacumawisang taler patut kasobyahang mangda kramane nenten salah tampi. Punika ngawinang saluiring kramane prasida nglanturang uripnyane ring tengahing masa sane abot sekadi mangkin.

    In Indonesian