I Sampi Masuwitra Ajak Goak

Cover sampi lan i goak.jpg
Location
Tabanan
Event
Dictionary words

    Summary



    In English

    In Balinese

    Suud manyi, liu beburone ngalih mamahan ka carike. Ada sampi, kambing, memeri, muang kedis. Beburon ane ngalih mamahan di carike tusing bani tekening i sampi. Sawireh beburon maawak gede tur situh ento pangenahne sumbung. Kasujatianne tusing. I Sampi beburon ane demen manyama braya maimbuh tuturne alus. Makelo-kelo mara beburon cenikan bani maekin I Sampi. I Kedis Perit lan I Kedis Curik paling demen matinggah di tundunne I sampi. I Kambing ane demen masesimbing paling demen ngorta ajak I Sampi ane baud. Sedek dina anu I Kedis Goak matinggah di carang kayune, paek di tongos sampine ngilag padang. Gak ., gak ., gak . I Sampi bangun ngrenjit tur nengengang matane ka tongos I Kedis Goak matinggah. Ia tusing demen ningehang munyin I Goak ane keras, beser, tur ngempengang kuping. He Goak, mendepang bungut caine Munyin caine tan bina drim belah, beser, nyakitang kuping nyakitang sirah Magedi cai uling dini He sampi, dadi icang masuwitra ngajak cai? Gaak gak , gak . saut I Goak. Sing dadi, icang tusing suka ngelah timpal buka cai. Magedi cai uling dini I Sampi ngulahin I Goak. I Goak lantas makeber magedi uling tongosne I Sampi ngilag padang. Munyinne ane seret ngancan joh ngancan nyenikang kanti tusing dingeha tekening I Sampi. Disubane I Goak magedi, mara I Sampi marasa liang. Apabuin di sampingne ada I kambing, I Kedis Perit, lan I Kedis Curik manguci. Tajeg surya, ri kala beburone iteh ngamah, I Sampi glalang gliling nanggehang sakit. Ipun makecos, nyadug-nyadugang tendasne di bongkol kayune, tur ngucek matane aji batis. Beburon lenan ane iteh ngalih mamahan ngaden I Sampi ngamuk. Tulung .., tulung Ada macek matan icange, ngahngah sajan rasane. Icang tusing ngenot apa, olasin ja icang, tulungin ja icang I Sampi kauk-kauk ngidih tulung. Cai kenken to? patakone I Kambing. Upinin jep matan icange. Kebus bara asane matan icange pangidihne I Sampi tekening I Kambing. Atah, icang sing bani. Cutetne tusing nyak, icang jejeh sakit caine nglalahin, saut I Kambing. Kenken matan caine to? Kal barak? patakon I Kedis Perit. Cotot jep matan icange Prit, mirib sepenan matan icange Tauk eh, icang sing bani. Matan caine mirib misi virus, icang jejeh cucuke kena virus, saut I Perit. Makejang timpalne tusing nyak nulungin kerana jejeh sakitne I Sampi nglalahin. I Sampi ngebeg-ngebegang matane di pundukane, nanging seletan matane tusing ka sisi. I Sampi glalang gliling naenang sakit maimbuh ngeling gerong-gerong. Munyin I Sampine ane ngelur dingeha tekening I Goak ane makeber di langite. I Goak ngenggalang ngalih I Sampi. Kenken cai to, nguda gerong-gerong ngeling? patakon I Goak mautsaha maekin I Sampi. I Sampi ane nanggehang sakit mata tusing masaut. Ia tusing nepukin beburon ane nakonin dewekne. Nanging ia nawang ane ngelah munyi seret ento tuah I Goak. I Sampi tusing ngrunguang I Goak ane gedegina ento. I Goak kapiangen ningalin I Sampi ane gede situh kalara-lara. Ia mineh-minehang utsaha apang nyidang nulungin I Sampi. Nadaksara I Goak makecog maimbuh matinggah di tendas sampine. Ia lantas nguntul tur nyototin matane I Sampi. I Goak nyidang mesuang somi ane neket di matane I Sampi. Prajani rasa sakit ane rasayanga tekening I Sampi ngendukang. Ipun adeng-adeng nengengang matane. Tinglis tingalina I Goak ane tundunga tur kacampahang ento suba majujuk di malune. Das cai buta yening somi ane neket di matan caine tusing ka sisiang. Gakkkk .., gakkkkk ., gakkkkk .. ucap I Goak sambilanga nujuhang somi ane seletan di matane I Sampi. Icang ngidih pelih tekening cai Goak. Icang pelih narka paukudan caine. Goban caine saja jele, nanging bikas caine melah. Cai mula timpal ane sujati, ada ri kala suka muang duka Icang ngaturang suksma tekening cai Goak

    In Indonesian

    Nothing was added yet.