I Jaran Lua Masang Daya Silib

Jaran masang daya silib.jpg
Location
Event
Dictionary words

    Summary



    In English

    In Balinese

    Di sisin Alas Kedatonne, entikan padange semumbung tur samah. Ditu i jaran lua tekening pianakne lua muani ngalih mamahan. Lega pesan kenehne ngilag padang. Baan selegne muponin amah-amahan, ngawinang i jaran tusing rungu kapin apa-apa buin. Dugase ento ada macan sedeng nglincak ngalih amah-amahan. Prajani liang kenehne I Macan sawireh nepukin pianak jaran mokoh-mokoh. Prajani ngetel puesne tur makeneh nyarap bebedage totonan. Yen ne amah sinah betek basange. Kai tusing lakar kuangan amah. Ada bebedag duang ukud, jeg caplok jani keto kenehne I Macan. Nanging kenehne makeledan sawireh inan jarane teka nyagjagin pianakne. I Macan lantas makeneh-keneh apang nyidang nyarap panak jarane. Prajani ia ngenehang winaya anggon nguluk-nguluk i jaran. I Macan lantas nyagjagin i jaran ane ngilag padang. Ditu lantas I Macan ngomong tekening I Jaran. Ih nyai jaran, pianak nyaine makadadua pangenehne seger, nanging sujatine ia gelem sanget. Yen depin tusing ubadin, sinah ia lakar ngemasin mati. Icang mateger ngubadin pianak nyaine, astungkara panjang tuwuh. Icang tusing dadi ati nepukin pianak nyaine makadadua nandang sakit buka keto. Ningeh munyinne I Macan, I Jaran Lua masaut dabdab. Icang ngaturang suksma tekening papineh caine ane melah. Mula saja, pianak icange makadadua gelem. Suba milih icang ngajakin ia maubad, nanging tusing karuan seger. Nah, ane jani sawireh cai nyadia ngubadin pianak icange, kenken patutne icang tekening cai? Icang madeolas, tulungin segerang pianak icange apang mararadan sakitne. Buih, kendel pesan kenehne I Macan ningehang pasaut tur pangidihne I Jaran Lua. Marasa tekening jaetne ngenen tur lakar aluh nyarap bebedage ento ane kaliwat jaen tur nyangluh. I Jaran Lua buin mapangadihan tekening I Macan. Nah Macan, ane jani icang nyerahang pianak icange makadadua tekening cai. Dumadak sangkaning patulung caine, pianak icange sida seger. I Macan anggut-anggut ningehang pangidihne I Jaran Lua. Nah, sujatine icang masih nandang sakit rahat buka jani. Batis icange ane kenawan suba uling makelo kena sungga tuara sida keles. Tegarang jani tulungin ngaadang sungga ane nebek batis icange apang tusing santul yening tindakang icang. Mara keto munyin i jaran, ditu lantas I Macan ngomong matandang egar. Nah jaran, ane encen batis nyaine ane tebek sungga? Lautang edengang apang beneh baan icang ngubadin I Jaran laut ningtingang batisne ane kenawan. I Macan siaga ngedasin telapakan batisne I Jaran Lua ane orahanga tebek sungga. Kala ditu I Jaran Lua sahasa ngajet tendas I Macane, kanti I Macan ketes glalang gliling, klenger makelo tusing maklisikan. I Jaran tekening pianak-pianakne ngenggalang malaib joh ngalih tongos ane silib apang tusing tepukina tekening I Macan. Keto pikolih anake ampah tusing ngelah keneh matanggaran.

    Kaketus saking satua Bali sane kamijilang olih CV Kayumas Agung

    In Indonesian

    Nothing was added yet.