I Tabuan Ngaku Ririh

I Tabuan Ngaku Ririh.jpg
Location
Event
Dictionary words

    Summary



    In English

    In Balinese

    Kaceritayang di umah meten Pan Cangklung ada tabuan maumah. Umahnyane gede tur I Tabuan setata nyumbungang dewekne. Ne jani I Tabuan pesu uling jumahne, diwangan jumahne ia kacunduk ajak I Meong. Ih cai Tabuan, cai lakar kija keto I Meong matakon. I Tabuan masaut sebengne tegeh ten dadi endepang, Ih cai Meong, icang lakar pesu ngalih lakar anggon mreteka umah. Umah icange gede agung tusing ada nyamen pada. Suud ngomong keto I Tabuan makeber ngindang. Di rurunge I Tabuan kacunduk ngajak I Kelinci. Nepukin I Tabuan dengang, I Kelici matakon, Mih, jeg sengap rengas plaib caine, gagesonan pesan cai makeber ngindang. Cai kal kija? Icang luas ngalih sakancan ane melah tur ngeredep anggon icang ngiasin umah icange. Cai bisa ngae umah melah cara icange? Yen sing bisa, ngorang beneh-beneh, yen icang baa da galah, icang nyadia ngurukang cai ngae umah ane ngredep. Johin dik, icang enggal-enggal ne Suud ngomong keto I Tabuan lantas magedi tusing ngorahang apabuin. Kaceritayang ane jani I Kelinci ngalih I Meong tur nyambatang parilaksanan I Tabuan ane sumbung. Ih Meong, kal keto sumbungne I Tabuan? Omongange degag, maimbuh campah tekening timpal. Dikenkene ia setata ngrusak gelah iragane. Buin jep, kal saduang teken I Bapa Cangklung, keto pasadun I Kelinci tekening I Meong. Matanaine suba sendeh kauh, Pan Cangklung teka uling tegalane nyelet arit maimbuh matengtengan gapgapan baanga I Kelinci lan I Meong. I Kelinci lan I Meong mlaib nyagjagin. Kendel pesan kenehne Pan Cangklung nepukin parisolah ubuh-ubuhane. Disubane Pan Cangklung suud manjus, laut ia negak di amben balene sambilanga nyiup kopi. I Kelinci lan I Meong lantas ngmaekin. Bapa ada ane takonang tiang tekening bapa, bapa nyak ningehang? Nah orahang suba apa ane dot takonang cai Kene pa, di meten umah bapane ada tabuan sedeng ngae umah, ia seteta sombong nyumbungang dewekne. Buina ia setata ngrusak gelah icange lan pagelah i Mengonge, keto pasadun I Kelinci. Ningeh pasadun I Kelinci lan I Meong buka keto, prajani erang Pan Cangklung maimbuh ngalih kayu anggone ngugug umahne I Tabuan. Dugase ento I Tabuan tonden teka uli pesu. Disubane Pan Cangklung ngidupang sundih, ditu mara I Tabuan teka. Laut macelep nuju umahnyane. Makesiab I Tabuan nepukin umahne benyah dekdek lidek. Erang keneh ipune tur sahasa nyander-nyander sakancan ane tepukina. Beh, wanen cai di jumah icange, keto Pan Cangklung ngrenggeng maimbuh nyemak sampat lidi tur nglanteg I Tabuan. I Tabuan ane kena damplak ngemasin mati. I Meong lan I Kelinci ningalin uling ejoh, sawireh ia tusing bani paek, jejeh gincer tabuan. Nah, rasayang suba jani, cai ngemasin mati ulian solah degag tur marasa paling ririh, keto I Kelinci lan I Meong masesambatan.

    In Indonesian

    In Makassar

    Nothing was added yet.