Raksasa Kala Bebau lan rencang-rencangne ngrubeda. Panjak di jagat Beraban kasengsaran. Padi di carike tusing mupu. Abian sela di tegale uyak merana. Panjak Beraban jerih ngarepang Kala Bebau kalintang sakti. Setata nagih tetadahan. Panjak Beraban liu madunungan, ninggal desa, nylametang raga. Makelo-kelo ada kepir-kepiran orta sang wiku nangun tapa semadi di Bukit Let. Sang Wiku malinggih di duur batune lempeh di tengah segarane. Ki Beraban pacang tangkil ring sang wiku. Kesyab Ki Bendesa nyingakin anak lingsir mateja petak. Sang wiku mabusana sarwa putih sajaba selendang mawarna poleng. Ki Bendesa negakin pedau ngalih genah pedanda nangun tapa. Ki Bendesa katerima olih Ida Pedanda. Pesengan idane, Danghyang Nirartha. Ki Bendesa ngungingayang panjak Beraban keni grubug. Uyak merana maimbuh ada raksasa ngrubeda. Danghyang Nirartha nguningayang panjak Beraban kena karmaphala. Engsap maring Ida Sanghyang Widhi Wasa sane mapica karahayuan. Ulian aluh ngejuk ebe, ulian aluh ngalih dedaran di carik muang di tegalan, dadi engsap tekening embang. Setata ngulurin keneh, majudi, matajen. Ida Sanghyang Indra ngatag raksasa apang manusane eling tekening Widhi. Ida Pedanda ledang mapitulung yening panjak Beraban masemaya mlajahin sastra agama. Ki Beraban cumpu lantas nyobiahang teken panjak Beraban mlajah ka pasraman sang wiku di Alas Ngendung. Panjak Beraban teleb nunas ajah ring Ida Pedanda. Panjak Beraban uning Panca Sradha, Sadripu, Panca yadnya, lan sastra agama tiosan. Ida Pedanda raris mapica keris kapining Ki Bendesa. Danghyang Nirartha nitahang Ki Bendesa nglawan Raksasa Kala Bebau lan rencangne. Ki Bendesa nyidang ngalahang raksasane. Sasukat raksasa kalah, kauripan panjak Beraban sayan sukertha. Ki Bendesa kairing panjak Beraban jagi ngaturang pamupon ring carik, segara, muang tegalan ring Danghyang Nirartha. Nanging Ida Pedanda sampun matilar saking pasraman Batu Ngenjung. Ki Bendesa kasarengin panjak raris ka genah sang wiku nangun tapa ring Bukit Let tengahing segara. Ida Sang Wiku sampun matilar. Wantah selendang poleng kecag derika. Ki Bendesa ngambil selendang punika raris wenten pawuwus. Cening Ki Bendesa lan panjak Beraban makejang, bapa garjita mapan cening ajak makejang teleb mlajahin agama lan nglaksanayang isin sastra. Jani bapa milu ngemit cening ajak makejang. Selendang poleng jatasemat dadi lelipi poleng ane setata nyaga kasucian tongose dini. Puput sabda punika, selendang sang wiku masalin rupa dadi lelipi poleng. Sasukat ento, Ki Bendesa kairing panjak Beraban masemaya ngwangun pura. Sapuput ngwangun pura, genah di Bukit Let tengahing segara kawastanin Pura Tanah Lot. Pasraman sang wiku di Alas Ngendung taler kawangunin pura. Pura punika kawastanin Pura Pakendungan.
Enable comment auto-refresher