Di tengah alase ada macan matimpal ajak meng. I Macan awakne gede, kereng ngamah, kewala belog. I Meng awakne cenik nanging duweg. I Macan maguru teken I Meng. I Macan ajaina malaib apang tusing tawanga teken burone lenan, tur paplajahan ane lenan. Kacerita jani, I Macan suba dueg. Sedek dina anu, I Macan masusupan di tengah alase lakar ngalih tatadahan. Karana burone suba pada tangar, dadi makelo ia masusupan, masih tusing maan apa-apa. Jani melahan I Meng dogen amah, karana i dewek suba dueg, tusing ada buin ane patut palajahin teken ia . Sambilanga ia makeneh keto, lantas ia malaib ngungsi tongosn I Meng. I Meng suba nawang teken satekan I Macan buka keto, ento awanane ia matagenan lakar malaib. Sasuban I Macan paek, lantas I Meng nyapatin, Ihh cai Macan, cai teka uli dija jeg gagison pesan. I Macan tusing mesaut, jag nerojog I Meng. Mara I Meng ukana dakepa, lantas ia malaib tur makecos ka punyan kayune. I Macan bengong ningalin karirihan I Meng buka keto. I Meng lantas ngomong, Bah cai Macan, kene pamales caine teken icang. Mara keto munyin I Meng, ngenggalang I Macan masaut sambilanga nyumbah-nyumbah, Ihh adi Meng, icang tusing ja makeneh mencanen cai, nanging icang makeneh negarang kabisan icange. Icang tusing ja ngugu omong cai ne ento, nah melah-melah suba cai nongos dini, icang cendekne suud matimpal ajak cai. Cendekne icang ngidih sinampura teken cai, icang enu dot malajah ajak cai. Icang tusing ja lakar nyak buin ngajahin cai. Karana icang nawang cai mula corah. Yen makejang bakat urukang, sinah cai aluh lakar ngamatiang icang. Nyet keto omongne, nanging I Macan kedeh masih nagih malajahin karirihan I Menge buka keto. Nanging I Meng tusing pesan nyak ngajahin I Macan. Ento awanann I Macan gedeg lantas ia ngomong, Nah cai Meng, yen cai sajan tusing nyak ngajahin icang, tangarin iban caine, karana icang tusing suud-suud lakar mencanen cai. Dija ja icang nepukin cai, tusing buungan icang lakar mencanen cai. Yen icang tusing nepukin cai, tain caine lakar bencanen, enceh caine tepuk, enceh caine lakar bencanen. Karana keto omongne I Macan, sai-sai I Meng tangar teken ibane. Ento awanane, yen I Meng meju wiadin ngenceh sai-sai mengkeb.
Enable comment auto-refresher