PPAM: Pada Pada Apang Majalan

Dagang Nasi Jinggo Jpg.jpg
5.00
(one vote)
Title (Other local language)
Photograph by
Sendiri
Reference for photograph
Author(s)
    Subject(s)
    • EkonomiBaliBangkit
    • opini
    • ppkm
    Reference
    Related Places
    Buleleng ,Singaraja
    Event
    Related scholarly work
    Reference
    Competition
    opini


    Agus Suambaranata

    one month ago
    Score 0
    Beneh masih keto bli/mbok. Tiang setuju pesan yen dagang-dagang ajengan mabukak kanti dagangane telah, ane penting anake mablanja tusing ngajeng di tempat utawi take away. Jani Satpol PP utawi Satgas Covid-19 ane patut nyambangin tongos-tongos rame apa buin tongos yowana-yowanane nongkrong. Ane ampah-ampah kene suba ane ngaenang nyansan aluh panglahlah Covid-19. Nyanan yen suba ngliunang kena covid-19, tur buin ada PPKM, makejang suba bareng ngruit. Pemerintah patut ngerti teken keadaan krama, keto masih krama patut trepti nyalanang protokol kesehatan. Apang sekadi penampen mbok/bli, pada-pada apang majalan....

    You are not allowed to post comments.

    Entered in the opini Wikithon

    Description


    In English

    In Balinese

    Atiban lebih covid-19 suba nyengkalen di gumine. Gering agung covid-19 sanget mapuara kaon ring sektor ekonomi lan pariwisata. Manut data Kemnaker kantos Maret 2021 sawetara 29 juta warga kilangan pakaryan sangkaning PHK wiadin dirumahkan. Warga Bali pamekasne sane sanget keni pakeweh mawinan ngandelang pariwisata. Apa buin jani mawuh kebijakan Pemerintah ngadaang Pemberlakuan Pembatasan Kegiatan Masyarakat PPKM Darurat Jawa-Bali ngawit tanggal 3 kantos 20 Juli 2021. Kramane kawatesin makarya lan madagang tuah kantos jam 8 peteng.

    Yen kramane ane ngelah gajih bulanan minabang aab jagat covid-19 lan PPKM tusing sanget ngranaang pakeweh. Ane nyansan keweh rakyat cenik ngandelang hasil harian ane galahne makarya wiadin madagang uling lingsir sanja kantos peteng, cara dagang nasi jinggo, dagang nasi kuning, dagang gorengan, dagang nasi goreng, dagang lalapan, dagang terang bulan, dagang canang, dagang sate lontong rombong, muah ane lenan. Di luung gumine konden karoan masi dagangane enggal payu apa buin gumi nedeng sayah cara jani mimbuh kawatesin madagang. Tutur dagang nasi jinggo di Jalan Surapati Buleleng ngorahang matakeh mancan maan madagang 50 tali rupiah ulian PPKM. Biasane anake rame mablanja meli nasi jinggo sawetara jam 10 peteng.

    Lantas kebijakan ane cara kenken ane paling luung? Manut tiang PPKM gentosin aji PPAM: Pada-Pada Apang Majalan . Masyarakate tusing kawatesin madagang kewala protokol kesehatan tetep kamargiang. Nganggen masker, cuci tangan, jaga jarak, ane lakar nglaksanaang pakaryan wajib mavaksin, yening mablanja dedaaran lebeng tusing ngajeng di tongosan wiadin dedaarane apang aba ka jero soang-soang. Tetujone apang tusing ngae kekumpulan wiadin kerumunan.

    Yen tiang ngrasaang langah anake meli terang bulan, gorengan, nasi jinggo ngajeng di tongose mablanja. Yen dagang-dagang ane biasane rame ngajeng di tongosan, cara kafe, angkringan, tongos-tongos nongkrong kekinian apang kasekenang tusing nampi makan di tempat turmaning nganggen Prokes ketat. Biasane liu anake ane ampah, tusing nyalanang Prokes disubane Pemerintahe ngicen galah. Lantas carane mastiang kenken?

    Satgas Covid-19 suba ada uling tingkat pusat kantos ka desa kelurahan lan desa adat. Anggaran operasional Satgas masi suba ada mawinan desa adat lan dinas jani suba ngelola anggaran ratusan kantos miliaran juta rupiah. Satgas Covide ene ane patut mastiang wiadin ngawal kebijakan PPAM: Pada-pada Apang Majalan. Yen suba ja memengkung mara kenain peringatan kantos panutupan.

    Di gumine cara jani mula saja PPKM; pada-pada keweh makeneh, pada-pada keweh maulehan. Yen kawatesin kantos jam 8 sinah rakyat cenike pamekas ane gegaene ngawit lingsir sanja kantos peteng marasa tusing maan keadilan. Pemerintahe patut ngamedalang kebijakan win win solution, Prokes tetep majalan, rakyate masi tetep idaang maulehan, pada-pada apang majalan. Yen suba pada-pada majalan sinah PPKM nados pang payu kaula maulehan, pang payu keloan maangkihan.

    In Indonesian

    Makassarese