Yening umpamiang sakadi angga sarira, Basa Bali wantah pinaka karna. Sakadi anak maosang tolih-tolih ngejohang Sayan iraga mautsaha ngamel, ipun sayan ngedohang. Paranayaka praja sampun mautsaha ngrajegang budaya Baline, nanging para yowanane akeh ngatepekang Basa Baline. Sujatine para yowana Baline sampun ngawangun paiketan-paiketan satmaka cihna sutindih ring Basa Bali. Nanging, indike punika wantah sakadi anget-angetan tain siape. Kabaos sumangat tur sumengken tuah akijapan mata.
Saking warsa 2018 kawentenan teknologi sampun prasida nyawis pikobet-pikobet ketunaan para yowana ring mabasa Bali. Makeh sampun media online nganggen Basa Bali sane prasida ngawetuwang kayun para yowanane nguratiang Basa Baline. Sinalih tunggal utsaha sane kalaksanayang kawentenan konten lumrahnyane marupa bebanyolan minakadi Rare Kual, Lawak Baline miwah sane lianan. Nanging, sapunapi indik orti sane mabasa Bali? Wenten ke yowana sane arsa jagi miragiang ? Napike BASABaliWiki mersidayang ngiring para yowana ngantukang Basa Baline puniki ?
BASABaliWiki inggih punika aplikasi digital sane kautamannyane marupa kamus Basa Bali. Yening nganggen aplikasi puniki, iraga mersidayang ngrereh artos Bahasa Indonesia dados Basa Bali utawi Basa Bali sane kabaosang prasida metu sasuratan aksara Balinyane. Iriki taler dados ngangge pasang sor singgih sane kaaptiang, taler imba kruna sane kaanggen ring sajeroning lengkara. Lianan ring punika, wenten taler galah makta Basa Baline ke Bahasa Inggris. Siosan ring kamus, ring BASABaliWiki iraga taler prasida ngawacen konten sane mapaiketan indik pakraman tur budaya Bali miwah ngawacen tatimbang anak siosan indik pikobet punika.
Yening iraga sampun ngawacen BASABaliWiki, sujatine Wiki puniki sampun ngayunin pamargi sane kreatif. Sane kapertama, kacumawisang menu kamus pinaka sarana sane kaarsayang ring para yowanane. Alit-alit mangkin pakewuh ring Basa Bali mawinan patut kawantu nganggen kamus. Sane kaping kalih, kacumawisang galah majeng ring sang sane ngawacen mangda prasida sareng nyurat. Sane kaping tiga, BASABaliWiki taler sampun ngalaksanayang pacentokan. Pacentokan ring rahina mangkin minakadi sarana sane pinih becik ngawinang yowanane maduwe kayun jagi nyarere. Sane kaping empat, Wiki puniki taler ngaryanin akun media sosial sane manut sakadi jamane mangkin upami facebook tur instagram. Niki pinaka cihna BASABaliWiki sampun mautsaha mamargi marerod sareng para yowanane. Sane kaping lima, konten media sosial BASABaliWiki sampun madaging video inspiratif indik budaya Bali nganggen Basa Bali sane becik.
Sane lalima punika prasida ngarya BASABaliWiki maduwe galah becik antuk ngrajegang budaya Baline. Dumogi nenten sakadi sane sampun-sampun, wantah sakadi tain siape. Sane kaaptiang, Wiki setata mautsaha nglaksanayang inovasi inggih punika ring sajeroning design tur kreativitas konten. Dados kawewehin fitur pinaka piranti melajah Basa Bali sane mabuat majeng ring sisya saking SD ngantos SMA. Piranti punika kaaptiang mangda prasida kawedar majeng ring para Guru, raris para Guru nyobyahang ring para sisyane. BaliWiki taler mangda pageh nyobyahang angga tur prasida nudut kayun krama Baline mangdane sareng-sareng nganggen Basa Bali.
Enable comment auto-refresher