Maosang indik kawentenan nguyah ring Bali, sinah sampun nyansan ngidikang utawi prasida kabaosang nyansan nenten kauratiang olih yowana Bali. Kawentenan inucap prasida kasokong saking orti Semarapura, Balipost.com, pinanggal masehi 25 Juli warsa 2017 sane mamurda Terancam Punah, Petani Garam Tanpa Regenerasi , ketelatarang nguyah ring wewidangan pesisir desa sayan ngreredang, krama sane nguyah nyansan ngidikang, taler nenten wenten sane pacang nerusang, punika dados pikobet dahat majeng ring pertanian uyah lokal tradisonal ring Bali. Silih tunggil sane ngawinang nyansan rerednyane yowana Bali sane nguyah, yening cingak saking panglimbaknyane, saking makudang-kudang warsa, petani uyah wenten seket KK, nanging ring pamarginyane, akeh sane beralih profesi dados ke pakaryan sane tiosan sane nyanjiang pikolih sane becikan, tur prasida ngewantu ekonomi kulawarga. Sane mangkin wantah mesisa pitulas KK, punika akehan mayusa sampun tua sane sampun sukil yening ngrereh pakaryan sane tiosan, taler para yowana madue penampen yening geginan dados petani uyah punika geginan sane nenten menarik utawi kuno, miwah bisnis ring sektor tambak garam utawi nguyah nenten ngametuang hasil sane becik. Kawigunaan teknologi durung nincap kaanggen ngewantu petani uyah ritatkala proses nguyah, kari ngangge cara tradisional, kapebuin para yowana mangkin identik sareng kemajuan teknologi. Data punika sampun muktiang yening akidik yowanane mangkin sane nguratiang nguyah ring Bali taler sane pinaka pikobet utama inggih punika penampen para yowana indik geginan dados petani uyah, nenten prasida ngawinang idupe landuh, kerta raharja. Yening parindikan asapunika nglantur mamargi, sinah petani uyah lokal ring Bali pacang punah.
Salian punika, manut Data Badan Pusat Statistik BPS , nyihnayang kawentenan tuunnyane akeh petani uyah sane ngasilang uyah lokal ring provinsi Bali periode warsa 2011 nyantos warsa 2016, inggih punika ring warsa 2011 3.339 ton, ring warsa 2015 asil uyah Bali punika 10.548 ton, nanging sayan tuun ring warsa 2016 dados 500 ton. Ring BPS punika taler katlatarang yening perkembangan luas lahan petani uyah ring warsa 2014 wantah 174 hektar, nglantur tuun pisan ring warsa 2016 dados 23 hektar. Kahanan puniki dados ius, mekirangnyane yowana sane kayun dados petani uyah. Napi malih wenten artikel saking Scientific News Magazine Edisi Agustus 2017, kabaosang akeh produksi uyah sane nenten pasti santukan makudang-kudang sane ngrananyang inggih punika nguyah kari ngange cara tradisional sane ngawinang akeh produksi magantung ring matan ai, suhu udara lan angin., miwah luas lahan nguyah ring Bali sayan nyupitang. Antuk kawentenang punika, kamuatang utsaha pemerintah mangda nincapang kasukertan para petani uyah, mangda nenten malih makirangnyane petani uyah ring Bali. Silih tunggil utsaha sane patut kalaksanayang pemerintah inggih punika ngewetuang kebijakan utawi awig-awig mapaiketan sareng regulasi pemasaran, lan perlindungan majeng ring petani uyah skala kecil. Yening pemerintah nenten nguratiang kawentenan puniki, sinah nguyah ring Bali pacang ical. Taler pemerintah mangda ngicenin uratian saking permodalan, bantuan pemberdayaan marupa cara produksi, bantuan prasarana produksi sane kaicenin majeng ring petani uyah mangda uyah Bali nenten kalah saing sareng uyah luar Bali lan uyah import, yening pemerintah sampun nglaksanayang sosialisasi lan ngamargiang regulasi sane becik saha ngicen bantuan permodalan, sinah nguyah ring Bali nenten sayan rered tur petani uyah tradisioanl pastika sayan maju.
Enable comment auto-refresher