Duk ane malu dugas treat yuga masa, ada kaceritayang Ida Sang Mahayogi sane maraga putus ane mapapasih utawi maparab Waikuntha. Ida Sang Waikuntha maraga mahamuni. Sadina dina ida nguncar Weda mantra mamuja Ida Bhatara Wisnu. Kaceritayang jani rikala peteng, Ida Sang Yogi Waikuntha ngidupang parapen utawi damar malengis nyuh di purane ento. Disubane keto, Ida Sang Yogi matilar budal ka pasraman idane. Lengis damare ane kaanggo ngendihang api di pura linggih Ida Bhatara Wisnu totonan, misi malem. Maleme ento makada ngudang watek para bikul kema. Maleme totonan amaha teken i bikul. Krana gageson ban layahne, lengis damare mabriok mure tur kalalah ban apine. Api damare ngancan ngedenang. Disubane apine gede, sinar apine ngranayang purane dadi galang. Dugase ento Ida Bhatara Wisnu ledang kayun idane sawireh ulian i bikul linggih idane dadi galang, sing ja peteng dedet. Gelisang cerita, sawireh suba maadan patitah karmaphala, i bikul tuah dadi amah-amahan i lelipi. Duk dina anu, i bikul sengkala, mati caplok lelipi. Malesat malayang atmaneiI bikul nuku Yama Loka. Di Yama Loka, para bala-bala Ida Bhatara Yama negul tur ngantung atmane i bikul sawireh bikasne di mercapada. Risedek para cikrabala Ida Bhatara Yama ngeretang tali pangul atma i bikul, ditu lantas rauh utusan Bhatara Wisnu tur ngandika, Ih para cikrabalan Ida Bhatara Yama, bani-bani kita negul tur ngantung atman i bikul. Mirib kita ajak makejang tusing nawang, i bikul nenenan parekan Bhatara Wisnu. Bikule ene setata ngae galang di pura linggih Bhatara Wisnu. Dugase ento i manusa tan parungu teken linggih Ida Bhatara Wisnu. Lus taline tur lebang i bikul. Jani ia lakar ajak tiang ka Wisnu Loka tangkil majeng ring Ida Bhatara Wisnu. Disubane keto lantas atman i bikul kaserahang ring utusan Bhatara Wisnu. I bikul ngiring utusan bhatara nuju kahyangan Ida Bhatara Wisnu. Atman i bikul nemuang bagia sujati di Wisnu Loka. Suen kasuen, suba lantas wates yusane, atman i bikul katitah mawali ka mercapada buin. Atman i bikul katitah numitis dadi putran ida sang prabu ane mahutama nyegjegang jagat. Ida sang prabu ane makardi karahayuan jagat. Nah keto kone kacerita i bikul ane ngayah tur ngemit parahyangan linggih Ida Bhatara Wisnu. Sang sapasira ja jemet, anteng ngayah tur subhakti tekening Ida Bhatara Wisnu, riwekas atmane lakar ngungsi Wisnu Loka utawi swargaloka. Buin besikne, yening numitis ka mercapada lakar dadi manusa utama.
Enable comment auto-refresher