Puisi Bali: Gering Nyaluk Makuta (I Putu Suwèka Oka Sugiharta)

Jpg.Gegambaran Gering Mamakuta. Kareka olih Ida Bagus Gde Adiputra Nindyeng Praja (Sisya SMPN 2 Semarapura).jpg
Title
Puisi Bali: Gering Nyaluk Makuta (I Putu Suwèka Oka Sugiharta)
Related Places
    Writer(s)
      Photographer(s)
        Reference
        Photo Credit
        Video Credit

        Description


        In English

        In Balinese

        Di Bali ortane magejeran

        Kocapan di Wuhan

        Di gumine gesit

        Nadak liu anak pajerit

        Sedih kelangan

        Wit geringe sukil katon

        Liu suba kalah dadi tanah dadi aon

        Anake mapayas tutur tusing bani kadropon

        Liunan cara masesemon

        Mapi-mapi tusing muatang pailon

        Nanging di kenehne jejeh kapinton

        Sasuban geringe ngutang-ngutang lampah

        Mileh-ilehan singgah

        Ngancan ilang munyine campah

        Miribang suba benyah dadi srapah

        Nyansan linyap kedeke bungah

        Takeh suba recah manadi utah

        Sang panatas ngadanin Korona

        Apan geringe nyaluk makuta

        Yen geringe suba magelung nata

        Tiang uli Bali matakon apa mirib warase suba wadih ngraja ?

        Uli Bali dingeh tiang geringe ene gegaen manusa

        Kareka baan makudang-kudang wisia

        Kadadiang sanjata utama

        Srana ngrejek satru magelar waja

        Kewala manusane nyen ngupapira ?

        Para lingsire di Bali ngorahang

        Suryane mamakuta caya

        Sunarane ngebekin akasa

        Kanti nyusupin hredaya

        Lemahe matemahan amerta

        Yan makutan suryane suba tusing enu dadi tamba

        Apa mirib manusane suba kaliwat drowaka ?

        Tusing di Bali dogenan

        Ngliunang anake nginyah natakin sunar surya

        Ngacepang gering di awakne enggal kapralina

        Nanging gering kenehne enu kapiara

        Apa mirib Hyang Sora lakar mapaica ?

        Negarane pastika ngelah makuta

        Uli Bali mase dingeh tiang

        Jani kuta negarane suba karejek grubug

        Kaulane seduk madugdug

        Masekeb baan kapaksa

        Apa mirib kutane enu pantes sumbungang ?

        Apa mirib kutane enu pangus angobang ?

        Lelingsire di Bali tusing wadih narta

        Makutan manusane tuah darma

        Boya mas mirah ane tuah ngae ulap mata

        Anake ane panjakin brana

        Bikasne tusing sida satia

        Joh para lakar bani mapunia

        Pepesan enu ngrebutin isin basang anak lara

        Apa mirib enu ada ane satia sedana ?

        Nganti buin pidan geringe nyaluk makuta ?

        Lelingsire narka nganti bikas ala manusane sida masalin jalan mula

        Nganti makutan suryane kasungkemin sujati

        Di sajebag negarane tusing ada anak nyakit ati

        Makutan ragane kaentikang baan bakti

        In Indonesian