Celebingkah Beten Biu, Mabakti Ngendah Ngawagne Liu
Buka sesenggake, celebingkah beten biu, gumi linggah ajak liu . Nak mula saja iraga idup di Bali kramane tusing ja tuah magama Hindu dogen. Anake sane magingsir ka Bali masih magenepan agamane, Islam, Kristen, Katolik, Budha. Kanti jangkep Baline ngelah tongos mabakti lima agama. Atep buin, contone kompleks Puja Mandala ring Nusa Penida.
Sabilang dauh lima das lemahe dugase tiang mara bangun, tusing ja munyin siap gen tiang dingeh. Jeg makalukan munyin adzan masjide saling pasaut. Saat gati anak Islame ngaturang bakti, kanti kesiab-kesiab tiang ningeh geluran toa masjide. Dong kenken kabar krama Baline, kone liunan kramane magama Hindu? Adi sing taen asane tiang ningeh munyin Tri Sandhya saling pasaut?
Eda ja ngaturang Tri Sandhya, anake mabakti ka pura gen misi ngendah. Anake ilu saat sajan ka pura mapusung. Jani jeg suba malenan, bajang-bajange bokne tuah macaklok baan jepit, di kenkene magambahan. Nyak buin bokne masemir gading, jeg patuh jenengne sekadi bok leak. Sedeng sibuk mangkune ngleneng lan mamantra, anake iteh nyelek HP, mabalih TikTok, sosmed, sing dadi gigisang. Ngawit kramaning sembah, sabilang ada anak cerik ngeling, solusine tuah baanga HP teken reramane. Anteng ja ia mecik game, mabalih YouTube, nanging gudip sajan limane ngedenang volume, sing dadi gigisang abedik. Jeg grimutan basange nepukin. Adi kene jadma Hindune mebakti? Tusing ke ngerasa elek?
Pangaptin tiange, yadiapin jamanne suba ngancan maju, parisolahe antuk ngaturang bakti sampunang ngatrek ka duri. Lan jani malajah nyaga solah, mabakti baan keneh ening tur nirmala, sampunang ngendah. Yen tusing ngawit saking iraga, nyen buin?
Aktifkan pemuatan ulang komentar otomatis