Napi ngawinang Pulo Baline buka kene? Bali sane asri tur ngulangunin mangkin sampun masiluran aji leluu ane madugdug dini ditu, tusing ade anak ane ngarunguang. Sebet tiang nyingakin, jani onyang suba tongos-tongos ane ada di desa kantos kota matekepin aji leluu.
Apa iraga dadi yowana Bali lakar ngelantas tusing rungu tekening palemahan pedidi? Kengken lakar gumi iragane? Para toris dogen nyak rungu teken gumi Bali ane kacihnayang baan nudukin leluu ring gumi iragane. Napi mawinan iraga ane lekad di Bali langah nyak maparilaksana keto? Minab ulian iraga suba tusing rungu. Bali sane kasub ka dura negara sawireh kaluihan jagatnyane, mangkin sampun nenten becik krana leluu puniki. Sampunang nyen kanti Bali sane ketah dados Pulo Seribu Pura puniki masiluran dados Pulo Seribu Leluu . Jalan jani iraga semeton Bali ajak makejang, cenik bajang, nguda wayah, makasami patut eling ring angga soang-soang tekening unduk utama ngelestariang palemahan sane sampun katamiang olih leluhur iraga. Makasami mautsaha mangda Pulo Bali mewali sekadi dumunan lan mewali kaloktah ka dura negara antuk keasrian tur kalestarian palemahannyane. Apang buin mani Pulo Bali prasida dados genah malancaran sane paling becik ring jagate. Iraga mangkin mangda mataki-taki sida ngicenin tetamian sane becik majeng pianak cucu kapungkur wekas.
Enable comment auto-refresher