Gering agung COVID-19 sampun iraga rasayang kirang langkung atiban tengah. Rikala COVID-19 wau ngeranjing, Presiden Indonesia sampun ngelaksanayang lockdown. Pariwisata katutup, sekolah taler katutup, para sisia dadosnyane melajah daring, tur akeh krama sane keni PHK. Virus COVID-19 puniki ngawinang perekonomian ring Bali surut. Sayan sue sayan ngakehang pasien virus COVID-19 puniki. Raris pemerintah ngametuang kebijakan-kebijakan, minakadi PSBB ngantos mangkin kawastanin PPKM. Pemerintah taler sampun ngicenin vaksin gratis. Nanging kasus virus COVID-19 puniki nenten je surut-surut. Ring situasi PPKM mangkin para kramane kaorahin nongos ring jumah soang-soang, sane wenten pakaryan utawi kepentingan wau dados medal. Sane medal taler keni penyekatan ring margine. Toko-toko kawatesin mabuka ngantos jam 8 peteng. Akeh kramane sane nenten cumpu tekening uger-uger sane kalaksanayang punika. Yening manut sekadi manah titiang, kebijakan sane kaambil pemerintah nenten je iwang. Titiang ngajinin pesan kebijakan pemerintah sane mautsaha nempasin penglalah virus COVID-19 puniki, nanging pemerintah taler patut uning yening akeh kramane sane ngrereh pangupa jiwa dados dagang ring margine. Yening jam dagang punika kawatesin selidan, Amunapi dagang punika polih maadolan? Napi malih yening mangkin pariwisata durung mewali sekadi jati mula. Yening pemerintah ngicenin wantuan sinah kramane kayun nongos ring jumah soang-soang. Nanging wantuan punika wantah wacana manten. Pemerintah pusat utawi presiden sampun ngicenin wantuan sakewala nenten neked ka kramane. Yening dados titiang nunas mangda pemerintah nyelehin malih wantuan punika kija kengsutne. Yening dados titiang taler nunas apang jam buka punika nenten kawatesin. Depang dagang punika mabuka sepatutnyane, sakewala nenten dados ngajeng drika utawi patut kaaba mulih. Majeng ring Satpol PP mangda pinih lagas nglaksanayang razia prokes minakadi masker, ngicenin arahan nenten dados mapupul, miwah sane lianan. Yening wenten anak sane memengkung, dados bubarang utawi keni denda. Yening samian krama kayun nginutin protokol kesehatan minakadi setata nganggen masker, ngwasuh tangan aji sabun utawi hand sanitizer , miwah nyaga jarak, pastika gering agung COVID-19 puniki prasida gelis metilar.
Aktifkan pemuatan ulang komentar otomatis