Sabilang sanja, Putu Ari marengin memene ka carike. Memene ngalap tunjung. Ia masi bareng ngalap tunjung. Magenepan pesan warnan tunjunge. Ada putih, ada barak, ada kuning, lan ada selem. Makejang nyak idup di telagane. Yeh telagane ening tis. Yeh telagane uli tukade. Di dulun telagane ada bedugul. Tongos ngepah yeh. Tetep maan yeh krana di dulune ada klebutan tetep mayeh kayang jani. Diastun sasih panes, tetep mayeh krana enu renes tetajukane di dulu. Petang telaga gelahanga teken reramane. Ada misi udang. Ada misi gurami. Ada masi misi bawal. Udang ane ubuha teken bapane pepesan madep apang ada anggona ngidupin dewekne. Ada anggona meyanin masekolah. Nyak melah ajin udange. Nyak gede-gede, kendel suba atine lakar maan arga melah. Kewala, amah-amahan udange masi mael ajine. Nganggo poral. Guramine di kenkene adepa masi. Di kapah-kapahe anggona sate masi. Bapane mula dueg ngae sate gurami. Yen biasane, magoreng utawi manyat-nyat. Limane Putu Ari tusing taen mrasa kenyel. Buka anak ngigel, ia ngalap tunjung. Ia nyambi gending-gending. Mirib baan kendelne lakar maan pipis anggona prabia masekolah. Pinih tusing maan bekel masuk. Tusing ngrasaang dingin yen suba ngalap tunjung. Demene ngalahang lelehe. Kendel maan dasa cekel tunjung. Pilihina tunjunge ane melah-melah. Ane tusing melah bungane kutanga. Sangkanga demen anake ane nendak tunjungne. Pilpilanga tunjunge katikne tusing puedanga apang tetep seger. Jujukanga di embere ane misi yeh. Kesiuhan tunjunge nyujuh cunguh. Miikne ampehang angin. Bungah muane Putu Ari lakar ngadep tunjung. Semengan, Putu Ari marengin memene ka peken. Ia gandenga teken memene. Ingetanga teken memene apang melah-melah magandeng. Tusing dadi kiap. Tusing makelo, suba antina teken langganane. Peh, enggal telah tunjungne Putu Ari. Langanane lega maan tunjung melah-melah buina seger-seger. Sautina baan kenyem dogen teken Putu Ari. Memene ningalin Putu Ari serdah muane. Pedalema masi sentanane belianga nasi jinggo abungkus. Sikut wareg di basangne Putu Ari. Saget ada anak cerik ngidih-ngidih maakin dewekne sedek ngajeng nasi jinggo. Limane tatakanga. Ia bengong mabalih anake di arepne. Tundikina memene. Orahina meliang nasi jinggo. Memene kenyem. Enjuhina pipis anggona meliang nasi jinggo. Anak cerik ane ngidih-ngidih ngwales baan kenyem.
Enable comment auto-refresher