PIKOBET SANE KAWETUANG OLIH ALIH FUNGSI LAHAN MAJENG RING KAURIPAN KRAMA BALI
Om Swastyastu,
Sane dahat wangiang titiang para angga panureksa, asapunika taler semeton yowana sane tresna sihin titiang. Sadurung titiang matur amatra, ngiring ngaturang puja pangastuti angayubagya majeng ring Ida Sang Hyang Widhi Wasa, duaning sangkaning asung kerta wara nugraha Ida, titiang ping kalih ida dane sareng sami prasida mapupul iriki ring sajeroning ngemiletin Wikhiton Partisipasi Publik, Bali Berorasi. Ring galahe sane becik puniki lugrayang titiang ngaturang pidarta utawi orasi sane mamurda Pikobet sane Kawetuang olih Alih Fungsi Lahan Majeng ring Kauripan Krama Bali
Para atiti miwah semeton yowana sareng sami alih fungsi lahan inggian punika magentosnyane kawigunan tanah. Alih fungsi lahan pamekasne ring Bali sayan warsa sayan nincap, kacihnayang antuk tanah carik utawi tegalan sane kadadosan paumahan utawi genah utsaha. Pikobet punika boyoja ring Bali kemanten, ring genah tiyosan ring sejebag Indonesia taler metu pikobet sane pateh. Riantukan Indonesia wantah silih sinunggil panegara agraris sane akehan kramane makarya ring widang pertanian. Pungkuran puniki tanah carik utawi tegal ring Bali, pemekasne ring genah sane nampek saking kota, akeh sane sampun kadadosan paumahan, pikobet punika presida metu dados blabar ritatkala masan sabeh riantukan genah resapan toya sayan surut, lan akeh taru sane kekawoanang ritatkala ngwangun genah paumahan anyar, taler sane ngewetuang pemanasan global.
Madasar antuk pikobet alih fungsi lahan puniki, titiang ngaptiang para pemimpin Bali sane pacang kapilih ring warsa 2024, prasida ngicen solusi parindikan alih fungsi lahan sane sayan nincap puniki. Pemimpin Baline keaptiang satya tur nyaga kawentenan tanah Bali, tur ngewetuang peraturan sane ngutamaang utawi nindihin, tanah, adat lan budaya Bali. Semeton yowana,ngiring sareng sami nyaga tanah Bali, saking baya alih fungsi lahan, gumanti tanah Bali prasida ajeg. Asapunika prasida aturang titiang, kirang langkung titiang nglungsur geng rena sinampura, puputang titiang antuk parama santhi, Om Santhi, Santhi, Santhi Om.
Enable comment auto-refresher