Kaping ajeng suksma aturang titiang majeng ring ugrawakya antuk galah sane sampun katiba ring pasikian titiang. Para angga panureksa sane wangiang titiang Tim BASAbali Wiki sane kusumayang titiang Para sameton sareng sami sane tresna sihin titiang Lugrayang titiang ngaturang panganjali umat, om swastyastu.
Bagia pisan manah titiang rahinane mangkin, duaning sangkaning pasuecan lan asung kertha wara nugraha lda Hyang Widhi Wasa, titiang kaicen galah ngaturang sarin-sarin manah titiange ring lomba Wikithon puniki. Suksma aturang titiang majeng para angga panureksa miwah tim BASAbali Wiki sane sampun ngwacen tulisan titiange.
Ring galah sane becik puniki, lugrayang titiang ngaturang pikobet sane patut katanganin olih calon pemimpin bali, inggih punika pikobet alih fungsi lahan carik ring Bali. Pulo Bali inggih punika pulo sane medue jadma akeh miwah ngancan nincap sabilang warsanyane. Punika sane ngeranayang wewangunan ring Bali nincap nganutin galah. Manut ring data Balai Pengkajian Teknologi Pertanian wenten 1.568 hektar carik sane makirang ulian kealih fungsiang dados umah, hotel, miwah wangunan sane lianan. Yening liu anake sane ngewangun wangunan nganggen lahan carik. Ring dija iraga sami nanem entik entikan? Ring dija krama Bali ngerereh sumber ajengan sane jakti seger tur mudah?. Napi malih Bali medue adat utawi budaya sane mewasta seke subak sane wantah warisan dunia kapagehang olih UNESCO. Saking pikobet puniki, titian ngaptiang para pemimpin bali sane pacing kapilih ring warsa 2024 mangda nguratiang indik pikobet alih fungsi lahan carik ring Bali mangda prasida puput.Pemimpin Bali kaaptiang mangda ngicen plang-plang utawi tanda peringatan mangda ten ngewangunin wangunan ring carik punika.
Asapunika sane prasida aturang titiang ring galahe mangkin. Mugi-mugi napi sane aturang titiang puniki prasida dados uratian tur dasar program kerja sane pacang kautamayang olih calon pamimpin sane jagi kapilih ring 2024.
Puputang titiang antuk parama santih om santih santih santih om.
Enable comment auto-refresher