Anak Ririh

Location
Bali
Event
Dictionary words

    Summary



    In English

    In Balinese

    Pan Karsa ajaka pianakne muani nanggap upah ngae semer di sisin rurung gede. Uli semeng makasanja ia ajaka dadua tusing mareren magae, sajawaning dinuju madaarne. Kenehne apang gegaene enggal pragat, tur lantas nampi upahne. Telung dina ia magae tan parerenan, semer suba dalem, ngantiang pragat. Kendelne tara bakat ban nuturang. Buin awai magae, pedas ia bakal nampi upah liu. Tan critanane manine semeng semer lakar katampiang teken ane mupahang. Petengne saget ujan bales pesan madulurang angin. Apeteng Pan Karsa tusing bisa pules ngenehang gegaene. Takut semere bek kaurugin tanah. Manine nu ruput ia ajaka pianakne nelokin semere, sambilang ngaba tambah. Saja lantas semer bek aji tanah. Pianakne sedih mapangenan. Pan Karsa masih mapangenan. Makelo ia bengong, mangenang kalacuran dewekne. Nangingke ia ngalih daya, apanga gegaene aluhan. Lantas ia ngomong teken pianakne. ih cening, de cai keweh, buin akejep dong ilang tanah ane ngurugin semerene. Ditu lantas Pan Karsa ngantungan baju muah capilne ditongos ngantungan buka ane suba-suba. Pianakne masih nuutang tingkah bapane. Buine tambah ane besikan bantangne tancebanga ka tanah ane ngurugin semere, muah ane lenan pejaga di sisin semer, suud keto lantas kalahina mengkeb. Kacrita anak sane mentas ditu pada ngon, ningalin baju muah capil magantung paek semere, tur ane ngelahang tuara ada. Apa buin mara ajinanga ada tambah ditu. Alihina tusing ada, kauk-kaukina tara ada masaut. Sayan makelo sayan liu anak pada kema tur pada ngenehang, anak ane ngae semer kaurugan baan tanah ditu. Lantas sahasa nyemak tambah, pada numbegin semer ento. Tanahne kagediang. Baan liu anak magae, buina tanah nu gebuh, dadiannya tuara makelo semere ento suba kedas buka ibin . Ditu Pan Karta malaib laib tur ngomong, inggih jeron sareng sami, tiang nunas pisan ring pitulung jeron sane paicaang ring tiang.

    In Indonesian

    Anak Ririh.png


    Foto: msatuabali.blogspot.com