Bali the island of god . Pinaka papindan sane katah kanikaang olih turise, Papindan puniki nyihnayang ring bali akeh wenten pura pinaka genah pangubaktian umat hindu, para krama hindu ring bali nglaksanayang upacara agama nganggen sarana upakara sane mawasta banten.
Krama hindu bali nglaksanayang upacara agama wenten sawilang molas rahina, asasih, nem sasih ngantos awarsa. Makadi purnama, tilem, galungan, kuningan, nyepi, miwah sane lianan. Punika makasami nganggen sarana banten.
Sane dados pikobet mangkin ring bali. Sawilang nglaksanayang upacara mis lungsuran bantene punika matumpuk-tumpuk ngantos tegeh kadi bukit. Yening pacang ngirangin bantene punika pastika nenten mresidang santukan punika sampun manut ring panglingsire nguni.
Raris sapunapi tata carane nepasin pikobete puniki?
Sane mangkin, titiang pinaka yowana bali ngamanahin sane kaanggen nepasin pikobet puniki mangda kakaryanin awig-awig sane mawasta KEDAS BALI .
Awig-awig puniki kasyagayang ring pura-pura sane wenten ring bali. Mangdane prasida ngirangin mis lungsuran upakara punika.
Daging awig-awig nyane inggih punika: 1. Pamedek patut makta banten nganggen sarana keben utawi sokasi , 2. Bantene punika patut malakar aji busung, 3. Nenten kadadosang makta tas kresek, 4. Riwusan ngaturang banten, lungsuran bantene punika patut kabakta budal ka jero soang-soang. anggen nyangkepin awig-awig Kedas Bali sane mangkin wenten rabuk sane maguna anggen para petanine, wastanyane POC Pupuk Organik Cair , ngaryanin POC puniki nenten ja meweh, makasami mis punika kadadosang siki wus punika kadagingin bahan-bahan ramah lingkungan makadi: 1. Punyan biu ane suba tua 2. Pusuh Biu 3. Entik biu sane mara mentik 4. Tain Kambing 5. MOL Em 4 6. Larutan sera 7. Larutan gula bali
Sisan lungsuran ring pura punika prasida kaolah kadadosang POC, raris nglantur POC punika kaedarang ka para petani. Rabuk puniki mabuat anggen ngamecikang sarwa sane katanemin.
Parilaksana puniki dumogi prasida kamargiang ring bali, mangdane prasida ngirangin mis upakara, mangdane bali prasida asri miwah kedas.
Sane mangkin ngiring sareng-sareng ngupapira jagad baline. Mangdane nenten mauwah lengkarane di ajeng dados Bali the island of rubbish .
Enable comment auto-refresher