Om Swastiastu Suksma aturang titiang antuk galah sane kapaica ring sikian titiang. Angga panureksa makasami sane dahat kusumayang titiang. Para calon anggota DPD RI 2024 sane wangiang titiang. Asapunika taler Ida Dane Semeton Bali sareng sami sane tresnasihin titiang. Pinih riin, lugrayang titiang ngaturang rasa angayubagia majeng ring Ida Sang Hyang Widhi Wasa sangkaning sih pasuecan Ida, iraga sareng sami prasida masadu ajeng ring acara puniki. Semeton Bali makasami, napi ke semeton eling daweg akeh krama Baline ring warsa 2023 puniki seda krana kacegut olih asu sane keni rabies? Napi ka semeton eling, ring sajeroning sadina-dina akudang asu ring margine sane nenten karunguang? Pikobet Bali darurat rabies puniki sane patut gelisan kauratian mangda nenten akeh malih krama Baline sane keni rabies. Rabies inggih punika penyungkan sane kalimbakan olih virus sane mawit saking beburon minakadi, asu, meng, wanara, taler sane tiosan. Nyantos mangkin, durung wenten tamba sane prasida nambanin rabies puniki. Punika mawinan, iraga sareng sami patut ngicenin uratian sane lintang ring buron-buron sane dados panengah panyebaran. Pangaptin titiang majeng ring Sang Angawerat Bali Tahun 2024 puniki, mangda prasida ngicalang penyungkan rabies sane sayan nglimbak ring Bali. Pencegahan rabies majalaran antuk vaksinasi rabies sane sayan gencar taler sayan kasokong genah-genah panampungan buron mangda kebersihan taler kesehatan buron ring Bali setata becik. Lianan punika, pamerintah mangda ngewentenan awig-awig sane madaging tatacara miara beburon sane becik taler nenten ngawinang durgama anak tiosan. Tetujonnyane mangda Bali ngamolihang target Bali Zero Rabies ring warsa 2024. Inggih wantah asapunika sane prasida atur titiang. Suksma antuk uratian Ida Dane sareng sami. Yening wenten sane nenten manut ring arsa, titiang nunas geng rena sinampura. Makasawananing atur, puputang titiang antuk paramasanti. Om Santih, Santih, Santih Om.
Enable comment auto-refresher