Wawidangan Seminyak wantah pinaka sinalih tunggil wawidangan pariwisata sane kasub lan akeh karauhin olih para tamiu lokal miwah manca negara ring wawidangan Badung. Nanging, sinarengan ring kawentenan pangelimbak pariwisata inicap, taler metu paindikan sane nenten becik ring kawentenan inucap saking warsa ke warsa marupa magentos nya kawentenan fungsi lahan sane pengawitnyane pinaka wawidangan carik, magentos dados piranti pariwisata sane marupa penginapan, bungalow miwah genah genah matumbasan modern sekadi swalayan sane dahat kabuatang olih para tamiu sane rauh ring wawidangan pariwisata sane wenten ring wawidangan Seminyak Badung.
Wenten pikobet siosan sane mapaiketang ring pikobet inucap sane akeh metu ring wawidangan seminyak inggihan punika, sane kawetuang olih pidabdab ngalimbaknyane pewangunan saking alih fungsi lahan pinaka carik dados penginapan, bungalow miwah genah matumbasan modern. Saking magentosnyane fungsi lahan inucap, ngawinang wenten wawidangan sane sering keni wicara blabar utawi wicara toya sane munggah ring wawidangan margi sane wenten ring wawidangan Seminyak, sane pamuputnyane ngawetuang wicara wicara lan nyandekang pakaryan pakaryan parajana sane wenten ring wawidangan inucap, rikala midabdabin pekaryan serahina rahina miwah kewentenan pidabdab pariwisata.
Ring pamuput sasih april 2024, akeh metu wicara blabar ring wawidangan Seminyak Kuta Badung, kawentenan puniki ngawinang pakaryan parajana nenten prasida mamargi secara becik, ngawinang krama makeh sane jenek ring paumahan ipun suang suang, nenten prasida makarya sekadi sepatutnyane, duaning kabanda antuk wicara blabar sane nibenin wawidangan Seminyak Badung. Saking wicara puniki, jagi metu pitaken, punapi sepatutnyane iraga ritatkala muputang pikobet inucap, mangdane kawentenan pariwisata ring Seminyak prasida mamargi antar. Yadiatun pemerintah sampun mautsaha nambakin kawentenan wicara blabar sane nibenin wawidangan Seminyak, sekadi ngamargiang pidabdab normalisasi saluran air, nanging pidabdab puniki nenten ngawetuang pikolih majeng parajana sane wenten ring wawidangan Seminyak Badung.
Pidabdab sane patut kamargiang wantah nenten marupa pidabdab sane kamargiang olih pemerintah kemanten, nanging patut taler kamargiag olih iraga pinaka generasi penerus bangsa. Duaning wicara sane metu sekadi puniki wantah mawit saking iraga pinaka manusa sane nenten prasida midabdabin raga ritatkala ngolah luwu sane wenten ring wawidangan iraga, sane setata ngentungang luwu ring tukad sane wenten ring wawidangan iraga. Pidabdab sane patut kamargiang wantah marupa pidabdab sane urati ring wawidangan, sane setata nyaga lan setata ngamargiang edukasi indik pidabdab ngelola luwu lan fungsi lahan, sekadi paribasa nyinahang, ring dija iraga magenah, irika patut iraga setata nyaga kawentenan palemahannyane.
Enable comment auto-refresher