Om Swastyastu Suksma aturang titiang majeng ring Tim BASAbali Wiki antuk galah sane kapaica ring pasikian titiang. Para angga panureksa sane dahat kusumayang titiang. Para calon pemimpin Bali sane wangiang titiang. Rasa angayubagia aturang titiang majeng ring Ida Sang Hyang Widhi Wasa. Ring galah sane becik puniki titiang jagi ngaturang orasi sane mamurda Nglestariang Budaya lan Basa Bali . Sadurungnyane, ampurayang titiang, titiang merasa wimuda tuna basa, tuna kaweruhan purun maatur - atur majeng ring ida sareng sami. Ida dane sareng sami, pastika sampun sami uning indik pulau Bali sane sampun kaloktah kantos ka dura negara, punika ngawinang jagat Baline kaparinama olih para janane Pulau Seribu Pura, Pulau Dewata, Pulau Surga . Sane ngawinang pulau Baline kaparinama asapunika boya ja tios, punika santukan keasrian palemahan pulau Baline, ka sarengin antuk seni lan budaya Bali. Mawinan asapunika iraga patut ngrajegang budaya Baline mangda budaya Bali tetep asri lan lestari. Sane kaanggen antuk nglestariang budaya Bali inggih punika wantah Basa Bali, tetabuhan lan igel - igelan sane pinaka tetamian saking leluhur Bali. Punika ngawinang iraga patut bangga dados penerus Bali. Ring jagat sane sampun merdeka sekadi mangkin, teknologi sampun modern, nika mawinan akeh para yowanane nenten nganggen basa Bali ritatkala matuturan sareng kaluarga miwah sareng timpal. Sujatine basa Bali pinaka basa ibu. Ngiring para yowana dagingin kamerdekaan lan jaman sane sampun modern puniki antuk ngrajegang basa lan budaya Bali, punika pinaka cihna bakti antuk iraga sareng sami. Mangda budaya Bali miwah basa Bali punika nenten rered. Ida dane sareng sami sane wangiang titiang, sekadi asapunika titiang prasida maatur - atur. Yening wenten iwang ring atur nenten munggah ring arsa, titiang nglungsur geng rena pangampura. Punika panguntat puputang titiang antuk parama santih. Om Santih Santih Santih Om
Enable comment auto-refresher