Om Swastyastu, Sane wangiang titiang para angga panureksa. Sapunika taler, para sameton yowane sareng sami sane tresnasihin titiang.
Pinih ajeng ngiring ngaturang rasa angayu bagia ring Ida Sang Hyang Widhi Wasa, duaning sangkaning pasuecan ida, titiang ngiring ida dane sareng sami prasida mapupul iriki sajeroning acara Wikithon Partisipasi Publik Bali Berorasi. Ring galah sane mangkin, lugrayang titiang ngaturang pidarta utawi orasi sane mamurda Pikobet Pariwisata Bali: Parilaksana Kaon Wisatawan sane Ngrusak Kebudayaan lan Tatanan Kauripan Krama Bali
Pariwisata Bali sampun kaloktah ngantos ka dura negara. Palemahannyane sane asri lan krama nyane sane ramah punika taler budaya adat istiadatnyane kantun rumaket ring kauripan krama Bali, punika sane ngawinang para wisatawane seneng melancaran ring Bali. Nanging, para wisatawan sane melancaran ring Bali sering melaksana corah tur menyimpang tekening awig-awig sane wenten ring Bali. Indike punika prasida ngrusak-asik kauripan adat istiadat krama Bali. Sakadi ring unduke dumun, wisatawan mancanegara malaksanakan corah tur mapenganggo sane nenten patut ring genah-genah sane suci inggih punika pura. Indike punika pinaka pelecehan agama lan budaya taler ngarusak kesucian pura. Yening indike punika nenten kauratiang, pacang ngawinang wisatawane ngancan ngendah, campah tur ngawinang citra pariwisata Bali ring mata dunia punika kaon.
Saking pikobet puniki, titiang ngaptiang para pemimpin Bali sane pacang kapilih ring warsa 2024 mangda nguratiang indik Baya Pariwisata Bali puniki. Pemimpin Baline kaapting prasida ngicen solusi sane patut lan usaha-usaha pencegahan sane katelantarang ring awig-awig utawi kebijakan sane patut katulad olih para wisatawan sane melancaran ring Bali.
Ngiring semeton Bali sareng sami, uratiang baya ring kawentenan jagat Bali sana sampun kasangguh pinaka genah pariwisata dunia. Wantah sapunika sane prasida katur, kirang langkung titiang nunas ampura tur puputang titiang antuk parama santi, Om santhi, santhi, santhi, Om.
Enable comment auto-refresher