Om Swastyastu.Dumogi iraga setata kenak lan rahayu. Ring rahinane mangkin, titiang jagi nlatarang penampen titiang indik disinformasi sane beredar ring media sosial tur napi carane nempasin disinfomasi punika. Semeton sareng sami, ring tanggal 8 Oktober 2020 wenten aksi demo ring Indonesia. Aksi demo puniki kalaksanyang olih para wagmi sane nenten cumpu tekening Omnibus Law UU Cipta Kerja. Para demonstran mapikayunan yening Omnibus Law nika nenten patut kamargiang. Aksi demo puniki krana wenten informasi iwang disinformasi sane nglimbak ring media sosial indik Omnibus Law punika. Disinformasi punika ngawinang akeh kramane sane tungkas tekening pamrintah tur nglaksanayang demo ring Gedung DPR. Demo punika ngranayanang akeh fasilitas utawi piranti umum sane usak. Bapak Presiden Jokowi lantas nguningayang yening wenten kaiwangan utawi disinformasi indik Omnibus Law punika. Semeton sareng sami, napike sane ngranayang iraga kena disinformasi? Iraga kena disinformasi utawi hoax krana iraga nenten nyaring informasi sane iraga polih. Rikala ngwacen informasi ring internet utawi media sosial, iraga patut ngrereh malih informasi punika ring sumber sane lianan. Informasi sane iraga polih punika patut kasaring dumun . Lianan punika yening wenten informasi sane nenten patut , iraga dados mabligbagan sareng sawitra, rerama, utawi kaluarga. Saling ngicenin penampen, ngicenin sumber informasi sane sampun yakti patut, tur dados iraga sharing utawi ngicenin informasi ring anak lianan sane nenten uning informasi punika. Mangdane iraga sareng sami nenten keni berita hoax. Disinformasi utawi berita hoax punika akeh pisan utamannyane ring media sosial. Nika mawinan iraga dados yowana sepatutnyane nyaring dumun informasi sane kapolih. Semeton sane tresnain titiang, disinformasi utawi hoax nika nenten je pikobet sane alit, dangan, utawi elah. Manut sekadi manah titiang, disinformasi sane nglimbak ring internet utawi media sosial nyidayang ngawinang pikobet sane ageng. Imbanya demo sane sampun titiang tlatarang. Manut ring parindikan punika, disinformasi ageng pisan wesanannyane. Nika mawinan iraga patut dueg milih-milih informasi tur nyaring informasi sane kapolih punika. Wantah kadi asapunika sane prasida aturang titiang. Titiang puput antuk parama shanti. Om Shanti Shanti Shanti Om.
Enable comment auto-refresher
ZAKIRAa
Permalink |
Luh Sanji Anjani
Permalink |