Penyandang Disabilitas Masuara Lowongan pekaryan majeng ring penyandang disabilitas
Om Swastyastu. Merdeka. Sane wangiang titiang para angga panureksa, sapunika taler semeton yowana sareng sami sane tresnasihin titiang. Pinih ajeng ngiring ngaturang rasa angayu bagia ring Ida Sang Hyang Widhi Wasa, duaning sangkaning pasuecan Ida, titiang ngiring ida dane sareng sami prasida mapupul iriki sajeroning acara wikiton partisipasi public Bali berorasi. Ring galahe mangkin, lugrayang titiang ngaturang pidarta utawi orasi sane mamurda Penyandang disabilitas masuara Lowongan pekaryan majeng ring penyandang disabilitas . Ring aab jagate sane mangkin nenten akeh wenten perusahaan sane ngawentenang lowongan pekaryan majeng ring penyandang disabilitas. Taler kirang nyane gatra indik lowongan pekaryan. Pemerintah sampun ngaryanang undang undang no 8 tahun 2016 indik penyandang disabilitas ring bagian kaping 4 indik pekerjaan, kewirausahaan dan koperasi. Swadarma perusahaan swasta wajib ngaryanang pekaryan paling kedik 1 penyandang disabilitas saking akehnyane pegawai sane wenten ring perusahaan punika. Nanging kawentenan sekadi mangkin kari wenten perusahaan sane durung uning indik undang undang inucap. Saking pikobete punika, titiang ngaptiang para pemimpin Bali sane pacang kapilih ring warsa 2024 mangda nguratiang indik lowongan pekaryan majeng ring penyandang disabilitas. Majeng ring para pemimpin sane kapilih puniki mangda ngicenin solusi sekadi ring dinas sane mapaiketan mangda memfasilitasi majeng lembaga sane madue lulusan penyandang disabilitas sareng perusahaan. Yening wenten perusahaan sane ngawentenang lowongan pekaryan mangda ngunggahang ring media social lan taler nyebarang brosur lowongan pekaryan majeng ring lembaga sane madue lulusan penyandang disabilitas. Punika taler majeng ring Lembaga Pelatihan Kerja LPK mangda ngicenin galah majeng lulusan penyandang disabilitas mangda polih nyarengin pelatihan kerja sane wenten drika. Wantah asapunika sane presida tunas titiang majeng ring para pemimpin sane pacang kapilih ring warsa 2024. Dumogi para pemimpin sane pacang kapilih puniki prasida ngemolihang solusi sane becik, mangda lulusan penyandang disabilitas polih pekaryan manut ring keterampilan sane sampun kapelajahin. Kirang langkung antuk titiang nunas ampura tur puputang titiang antuk parama santi. Om Santhi, santhi, santhi om.
Enable comment auto-refresher
Anonymous user #1
Permalink |