I Kedis Piyit
Summary
In English
In Balinese
Dugas gumine masan terak, I Piyit ngasanin awakne kebus, ongkeb. Ia ngamelmel, tusing terima teken unduke buka keto. Lantas ia mekaad uling umah palekadanne. Kocap madaja anginne tis banban, ia makeber ngajanang. Sajan, I Piyit ngasanin anginne tis sumilir. Ngancan makeber ngajanang, ngancan tis karasayang. Ia ngancan kadaut makeber ngajanang ngalih tongos paling tis. Ulian kedeh kenehne ngalih tongos paling tis, I Piyit tusing ngrasayang kampidne deket salju. Ngancan makelo ngancan nebelang saljune nempel di awakne. I Piyit ulung magbelug ka tanahe. Kaukud awakne kaput salju, ia tusing nyidang makiba. Ia ngeling sigsigan, nyeselin dewekne tamis-tamis mati. I Kebo ane ningeh I Piyit ngeling sigsigan lantas maekin. Nanging I Piyit kuciwa tekening I Kebo. Ia nengkik tur nyambatang beburone ento gede-gede ondo, olog-olog pong. Beburon tan paguna. Yadiastun jele pamunyinne I Piyit, I Kebo tusing nyautin. Beburon gede ento majujuk lantas ngincehin I Kedis Piyit. Kedis cenik gilik ento ngancan pedih lan mamisuh. Nanging I Kebo mendep. Beburon matanduk ento matindakan lantas mejunin I Piyit. I Piyit tangkeb tain kebo, tusing nyidang makiba. Angkihanne empet-empet. Narka dewekne pacang mati sawireh tusing nyidang maangkihan. Nanging, ngancan makelo, I Piyit ngasanin awakne anget. Salju ane nempel di bulune ngancan enceh sangkaning panes tainne I Kebo. Kedis cerik ento nyidang maangkihan lan ningalin langite galang. I Piyit kedek girang, magending sakita kenehne. I Meong ane sedeng ngalih amah lantas maekin I Piyit. I Meong ngenjuhang limanne lantas nyaup I Piyit. Kedis cerik ento timang-timange tekening I Meong. Bulune I Piyit kasilapin kanti kedas, tusing ada salju masisa nempelin awakne. I Piyit girang sawireh awakne kedas kajatimula. Kendel, marasa maan timpal urati. Buin kejepne, gumine peteng. I Meong nyaplok I Piyit.
In Indonesian
Enable comment auto-refresher