Sakadi sane kauningin yening jagat nenten wenten manggala utawi pemerintah, sinah nenten prasida memargi antar, punika taler manggala yening nenten wenten krama pastike nenten prasida memargi antar. Sujatinnyane manggala, krama, miwah jagat wewidangan dados siki tur saling mapaiketan. Ngiring mangkin cingakin ring pelemahan iraga ring Indonesia, ring zaman modern sakadi mangkin manggala, krama, taler jagate napike prasida memargi antar, prasida raket? Duk riin, raja utawi prabu ngangge sastra-sastra pinaka geguat ritatkala ngemargiang jagate, silihtunggil sastra sane keanggen inggih punika Asta Brata ngenenin indik parilaksana dados manggala utawi raja, taler Niti Sastra indik tata negara ring Agama Hindu. Sane mangkin napike ajah-ajahan punika prasida malih memargi sekadi dumun? Yening manut padewekan titiang nenten prasida memargi, santukan mangkin akeh para manggala sane nenten adil utawi andap aneh, nenten ngilonin dharma taler nenten urati ring krama, tur setata nyumbungan raga antuk meparilaksana nganutin pikayunannyane sane nenten medasar hukum. Sakadi sane wenten ring fortal berita amp.kompas.com, sane midartayang indik kasus pembunuhan Brigadir J utawi Yosua Hutabarat oleh Ferdy Sambo pinaka silih tunggil mantan perwira tinggi Polri sane medue pangkat Inspektur Jentral Polisi, dane meparilaksana nenten becik nenten manut ring sesana dados manggala, dane ngandikanin para polisi mangda ngamademang Brigadier J, taler ngicalang piranti-piranti sane keanggen, minakadi CCTV, Pistol, miwah sane lianan. Napike manggala sane sekadi punika kewastanin becik? Sampun pastika nenten becik, manggala sane mangkin mabinayan pisan sareng manggala raja sane dumun. Duk riin ring Bali wenten silihtunggil raja sane malaksana becik, sane setata setinut ring dharma, susatia ring krama, sane melaksana adil ring krama, sane ngangge Asta Brata miwah Niti Sastra pinaka geguat ngemargiang jagate. Sang Prabu utawi raja punika maparab Sang Raja Maruhani Sri Dharmodayana Warmadewa utawi Raja Udayana. Manut ring prasasti Batur Pura Abang, Prabu Udayana nenten ngelaksanayang pajak ring krama, Indik punika ngawinan krama dangan ritatkala ngemargiang swadarma dados pengangon, Prabu Udayana taler medue oka sane wicaksana, taler silhtunggilnyane dados Raja Prabu ring jawi ring kerajaan kediri. Cingakin mangkin ring Indonesia akeh pianak manggala utawi pejabat sane nanten nginutin dharma, nenten medue prikemanusiaan, sekadi sane lumbrah kecingak ring media sosial mangkin, napike parilaksana sakadi punika patut dados tetuladan, prasida dados menggala kepungkur wekas? Manggala sepatutnyane medue parilaksana sakadi Sang Prabu, yening kawentenan manggala ring Indonesia sampun sakadi punika pastike jagate trepti.
Aktifkan pemuatan ulang komentar otomatis