Para angga panureksa sane wangiang titiang, tim BASAbaliWiki sane kusumayang titiang, taler para semeton Bali sane tresnasihin titiang. Sadurung lanturang titiang, ngiring sareng sareng nyakupang kara kalih ngojarang pangastungkara Om Swastyastu . Suksma antuk galah sane katiba ring sikian titiang. Gargita dahat manah titiang, sangkaning pasuecan Ida Sang Hyang Widhi Wasa sane mangkin titiang prasida ngaturang sarin-sarin manah titiang indik pikobet sane urgen pisan ring Bali. Yening iraga maosang indik masa depan Bali, napi sane wenten ring pikayunan ragane? Inggih, silih sinunggilnyane inggih punika pariwisata. Silih sinunggil pikobet sane pinih urgen sane patut katureksain olih para calon pemimpin Bali inggih punika sapunapi pariwisata, pinaka tulang punggung perekonomian ring Bali mangda prasida nglantur tanpa ngrusak palemahan miwah budaya sane wenten ring Bali. Nanging, keberlanjutan nenten wantah mapaiketan ring pariwisata. Sangkaning punika, para calon pemimpin Bali patut ngicenin pamargi mangda prasida ngukuhang keseimbangan pantaraning panglimbak pariwisata miwah kalestarian palemahan tur budaya Bali. Sane prasida kamargiang olih para calon pemimpin Bali inggih punika nglaksanayang parikrama utawi acara sane mapaiketan sareng pelestarian lingkungan miwah budaya, sakadi nglaksanayang parikrama mareresik ring segara soang-soang daerah, pertunjukan seni miwah budaya, tur pastika kasarengin antuk pengawasan saking pemerintah lokal mangda program punika pamarginyane becik.
Inggih wantah asapunika sane prasida aturang titiang. Titiang nunas ampura yening wenten kaiwangan titiang sane nenten manut ring manah semeton sami. Dumogi pikobet sane wenten ring Bali prasida polih solusi sane patut lan becik. Puputang titiang antuk paramasantih Om Santih Santih Santih Om .
Enable comment auto-refresher