Om Swastyastu, sane wangiang titiang para panureksa tim BASAbali Wiki miwah krama semeton Bali sane tresna asihin titiang. Kaping ajeng ngiring ngaturang rasa angayubagia majeng ring Ida Sang Hyang Widhi Wasa duaning pasuecan Ida, iraga sareng sami prasida mapupul ring wimbakara BASAbali Wikithon Partisipasi Publik Bali-Berorasi. Ring galahe sane becik puniki, lugrayang titiang ngaturang orasi sane mamurda Kemiskinan ring Bali.
Kawentenan krama sane tiwas nenten prasida katambakin ring wewidangan, utamanyane ring Provinsi Bali. Manut data Badan Pusat Statistik BPS angka kemiskinan ring Bali ritatkala pandemi COVID-19 nincap pisan saking 3,61 pinih endep ring nasional nincap dados 4,72 , miwah menduduki peringkat kaping papat ring Indonesia. Paumahan krama sane kantun malakar saking ulatan tiing, listrik san kantun kirang, miwah alit-alit desa sane nenten masekolah, punika pinaka bukti indik Bali durung bebas saking krama sane tiwas. Manut saking data Badan Statistik Pusat, Buleleng ngamolihang genah kapertama pinaka wewidangan sane pinih miskin ring Provinsi Bali. Para manggala Bali patut mautsaha nepasin pikobet puniki. Malarapan pemerdayaan kramane miwah ngicenin wantuan punika prasida kedadosang strategi para manggala keanggen ngirangin angka kemiskinan sane wenten ring Bali. Puniki mangdane konsisten kelaksanayang olih pemerintah sane kapilih ring warsa 2024. Titiang percaya yening para manggala gelis mautsaha, sinah sinamian krama Bali polih kerahayuan lan kerta raharja.
Inggih wantah asapunika sane prasida aturang titiang, dumogi wenten pikenohnyane majeng ring pemimpin Bali sane kapilih ring warsa 2024. Kirang langkung titiang nunas pangampura. Puputang titiang antuk paramasantih, Om Santih, Santih, Santih Om.
Enable comment auto-refresher