Dibi titiang malali ke tukade sambilang mancing. Angen titiang ngatonang yeh tukade linggah sing misi yeh. Ada ngenah embahan yeh, meh tuah akecritan, sing cocok teken tampak tukade ane linggah. Kewala yen nuju ujane bales saja ja yeh ne gede wireh belabar, yehne putek ulian liu ada embidan di luanan. Kewala yen suba endang ujane sinah milu tukade kandas. Manut titiang paundukane ene sing ja len ane ngeranaang tuah di luanan. Ento akah-akah kayune ane biasane ngisiang yehe ngisiang gumine apang tusing mecelos, jani suba telah berek wireh punyane telah baha teken anake corah. Tegarang je kenehang, gumi baline ane cupek ene, jani yen iraga ngusak-asik alasne ane dadi pangantungan urip iraga manian dija panak cucune lakar ngoyong? Jele kalawan melah gumi Baline tuah iraga sane ngeranayang. Krama Baline patutne sutindih nyaga alase di Bali. Tusing ja tuah tugas pemerintah dogen nyaga alase. Sakewala pemerintahe masih patut mautsaha sayan rungu ring kawentenan alase sane sayan rusak.
Enable comment auto-refresher