Krama Bali sami sampun uning asapunapi kahanan Baline sekadi mangkin. Bilih-bilih ring sisi kelod pulo Bali inggih punika, TPA utawi Tempat Pembuangan Akhir sane magenah ring Suwung, Desa Adat Serangan. Kalih bulan sane lintang ring Wraspati, 12 Oktober 2023 wenten kebakaran ageng sane ngawinang polusi udara ring Bali Selatan. Petugas pemadam kebakaran sane nampek ring TPA puniki sampun mautsaha mademang api sane sayan ageng. Santukan luu sane mapupul ring genah punika akeh pisan ngawinang petugas meweh mademang api.
Yening nenten karerehang genah ngutang luu sane tioasan, luu ring TPA Suwung punika pacang sayan ngakehang dados gunung sampah. Makeh pikobet sane metu saking tumpukan luu puniki, yening selehin saking segi kesehatan pacang ngwetuang pinungkan makadi diare, demam berdarah santukan akeh legu drika, penyakit kulit miwah sane lianan. Selehin saking segi lingkungan, pacang ngwetuang polusi udara saking aroma luu sane numpuk, limbah saking tumpukan luu punika pacang ngrosak rawa mangrove ring wewidangan Suwung, miwah pacang nyemerin tanah sane wenten ring wewidangan desa punika.
Pemerintah miwah krama Bali sapatutnyane sareng-sareng ngrereh solusi kanggen nanggulangin pikobet puniki. Santukan pikobet puniki akeh nelasang galah ngrereh solusi, mangkin ngiring kawitin saking angga soang-soang. Sane pinih alit kawitin saking rumah tangga utawi jero soang-soang. Pilah pilih luu asil rumah tanggah makadi luu organik inggih punika sisa ajengan, doan-donan, miwah sisa upakara. Taler luu anorganik utawi sane nenten prasida kaurai makadi plastik, botol minum, kertas, sterofoam, miwah kaca. Luu punika mangda kapilah dumun ring jero, yening luu organik dados kanggen pupuk, luu anorganik dados daur ulang malih. Panglimbaknyane mangkin sampun akeh desa sane makarya TPS ring soang-soang desa. TPS puniki akeh sampun ngwantu ngirangang pengiriman sampah ka TPA Suwung santukan sampun kapilah miwah kaolah ring soang-soang desa. Pemerintah miwah calon pemimpin sapatutnyane nguratiang utsaha puniki pinaka sinalih tunggil solusi nanggulangin pikobet ring TPA Suwung.
Enable comment auto-refresher