Jatmane makejang patut urati teken masalah lulu ane suba nyansan ngeweh-ngewehang buka jani. Mirib makejang anake nekaang lulu. Ada lulu uli rumah tangga, ada uli usaha, ada uli sisan ngelah gae, kanti sisan upakara. Iraga anak aluh pesan ngae apa-apa, yen bandingang ngitungang ane di tebenan buka lulune. Dong tingalin ja TPA Suwunge. Jeg suba cara gunung lulune. Petugas kebersihane masih keweh ngitungang lulune ane suba matumpuk cara keto. Ada masane kanti tutupa, tusing nyidang ngaba lulu ke TPA. Yen suba keto, nyen dini di gumine ada anak ane las tongos wiadin tanahne dadi tongos ngejang lulu? Bilih-bilih dadi TPA. Anake sujana suba kone mautsaha ngolah lulune baan teknologi apang dadi barang maguna cara pupuk tur ane lenan. Kewala kanti jani tonden maunduk. Bone tileh kesyur-kesyur, andus nunjel lulune tusing nyidang ngengkebang. Yen dadi tiang ngidih tur mapangapti, apanga iraga ajak makejang yatna-yatna uli jani. Laan pabedikin ngae lulu. Ane patutne dadi anggon, jeg anggon malu. Ane patutne dadi olah, laan olah malu. Anggon srana-srana ane organik. Pabedikin nganggon plastik tuah anggon cepok. Mula keweh, sing ada ngorang aluh. Kewala yen buat ajak makejang ngudiang bas ngekoh. Apang tusing Baline urug lulu buin mani.
Aktifkan pemuatan ulang komentar otomatis
Donika92
Permalink |