Sebet bayune mamaca media sosial masane mangkin. Makacakan tutur anake saling pajengahin, pakrimik nyelek-nyelekang agama anak lenan. Wenten abesik ane menekang video lan gambar maisi cacadan, ten kanti a jam saget sampun satus anake maiyegan di kolom komentar. Yadiastun tuah dunia maya, nanging nyidaang ngaenang sebet, setres, tur gedeg. Ane jejehin, ngaenang siat dadine kanti ka dunia nyata. Siat jak nyame. Hindu, Kristen, Islam, lan Budha. Kar kenken panadian jagat iragane ? Marebutin ane tuara tuara. Marebutin munyi. Masyarakat dadi korban. Anak cenik mare lekad dadi korban. Lantas, kenken carane apang ten kenten unduk jagate ? Ampunang baange teknologi ngaenang pecah. Pertama, di sekolah lan di jumah sepatutne maan ilmu bermedia sosial. Maan satuan anak lingsir unduk engken ane patut kalaksanaang, engken ane ten patut. Mangkin anake lingsir patut masi ngemang tutur unduk kenken nganggon HP ane beneh. Ampunang kanti HP-ne jumah ane tuah celek dogen, kanti ngaenang biyota. Lenan teken nika, pemerintah sepatutne nue tim ahli teknologi ane nyidaang ngejang pelacak di media sosial. Yen wenten postingan lan komentar nyatuaang unduk SARA, lautang penekang drika kotak dialog otomatis. Di tengah kotak nika isinin lantas aksara mawarna barak. Aksara ane marupa tutur ngingetang unduk kadadianne postingan nika yen lanturang. Tutur ane penting nika ngingetang unduk Bhineka Tunggal Ika, apang ane jagi komentar lan sang makarya postingan becat inget teken raga. Ingat teken kabinaan tuah mabesikan. Iraga di jagate makejang tuah manyama. Kenten pangaptine, kawentenan kotak aksara barak patut kaplajahin. Yowana ane dadi panerus apang stata bareng-bareng mamiara jagate nganggon ilmu teknologi.
Aktifkan pemuatan ulang komentar otomatis