Pariwisata maderbe pengaruh sane signifikan ring genah makarya miwah pendapatan daerah. Sakewanten, ketergantungan miwah pangremba sane iwang prasida ngawinang pariwisatane punika ngusak-asik palemahan tur ngawinang Bali kabrebehan, sakadi ri kala gering agung Covid-19. Krama Baline nyansan akeh sane makarya ring sektor pariwisata katimbang sektor domestik sakadi matetanduran ring sawah wiadin abian. Mawinan, ri kala gering agung sakadi mangkin, sektor pertanian puniki taler meweh santukan kirangan lahan, sistem, miwah sumber daya manusia. Napi malih, sektor puniki pertanian perkebunan sane sujatine dados solusi anggen nincapang perekonomian Baline.
Silih tunggil utsaha sane prasida kamargiang mangda nenten milih silih tunggil pantaraning pariwisata miwah palemahan, inggih punika nganutin konsep pariwisata sane berbasis komunitas utawi CBT Community Based Tourism . Konsep puniki prasida kalimbakang antuk ngwangun desa wisata sane dados genah utawi stimulus nglimbakang ekonomi majeng krama desane punika. Sakadi konsep desa wisata sane nglimbak ring Jawi, sampun akeh sane fokus ring wewidangan desa miwah palemahan pinaka daya tarik wisata. Swagina krama sane matetanduran tur maabian prasida dados daya tarik alternatif majeng wisatawan saking durawipa utawi duranegara, santukan ring Bali wenten sistem pertanian sane unik. Yening sampun ngamargiang konsep puniki, astungkara tingkat sustainabilitas utawi keberlanjutan pariwisata miwah palemahan prasida ngamecikang. Mawasana, yening wenten bencana alam utawi gering agung sane nibenin pariwisata masal ring Bali, reragragan pariwisata CBT puniki dados solusi sane becik. Duaning ri kala pangrauh wisatawane nguredang, sektor pertanian kantun dados andelang. Tiosan ring punika, konsep puniki prasida kaanggen wangun anyar pariwisata Bali sane sampun kasub ring bisnis hospitality, pemandangan pasisi, miwah hedonistik, sakewanten daya tarik budaya kalaliang. Konsep CBT puniki muatang masterplan sane becik, mawinan, panglimbak ipunne prasida tepat sasaran. Tiosan ring punika, konsep puniki taler prasida dados sulusi ngamanggihang SGD utawi Sustainable Development Goals, taler nepasin eksploitasi ring palemahan.
Enable comment auto-refresher