Bali kaloktah antuk budayanyane kantos ka dura negara. Silih sinunggil budayanyane sane pinih kaloktah inggih punika budaya saling asah, asih lan asuh. Punika mawinan wisatawane kadaut manahnyane tekening Bali. Nanging mangkin, budaya Bali sane saling asah, asih lan asuh majeng ring para krama Baline kerasa ngancan ical kerasayang. Imbanyane wenten wisatawan sane ngawagin makta montor, para karma Baline pacang ngeraos Adaaah, biasa to adane gen bule . Malianan pesan yening wenten karma Bali sane ngawagin makta montor, pastika pacang mabaos sakadi cing jelema to, care sing taen ngaba montor di jalane gen, mara ngaba montor luung gen ba mrekak . Wenten taler imba sane lianan yening wenten para wisatawan utamanyane wisatawan asing sane maparilaksana nenten patut ring awig-awig, para karma Baline pastika pacang nenten kroda tekening parilaksana wisatawan asing punika. Nanging, yening wenten krama Baline sane ngalaksanayang parilaksana sakadi punika, pastika pacang kapidanda. Salanturnyane titiang ngaptiang sumangdane kawentenan sakadi punika mangda kaobah. Pulo Bali akehan kramane sane makarya ring pariwisata, sane ngawinang krama Baline pacang saling asah, asih, lan asuh ring para wisatawan. Nanging, boya ja sepatutnyane iraga mangda setata saling asah, asih lan asuh tekening nyama peturu lokal asli Bali? Sampun sapatutne iraga sareng sami ngawit mangkin malaksana nganutin awig-awig mangda Bali prasida trepti. Sampun sepatutnyane iraga melajahang dewek, nyikiang kayun mangda sareng-sareng ngajegang lan ngalestariang Bali antuk malaksana nganutin awig-awig sane wenten ring Bali. Titiang ngaptiang iraga sareng sami pamekas krama Bali mangda stata saling asah, asih lan asuh krana iraga pada manyama.
Enable comment auto-refresher