Jadma sane embas warsa 2000-an pinaka palihan saking gen Z, pepes kabaosang generasi strobery. Sekadi rupan woh stroberine, ring sisi kacingak becik pisan nanging ring tengahipun gelis usak. Generasi strobery inggih punika anak alit tur yowana sane kasengguh gelis keni pengaruh, sensitif, tur nenten pageh ngelawan pikobet. Istilah punika kaicen boya ja tanpa unduk. Makeh kapanggih sengkala sane kaawinang oleh papineh para yowana sane nenten pageh. Silih sinunggil ipun inggih punika kasus pademnyane Ayu Miranda, anak bajang saking Desa Antiga Karangasem sane padem ulah pati sangkaning pegat matresna. Sane tiosan inggih punika kasus sisya saking Kecamatan Bebandem ngulah pati saantukan pikobet tresna, tur sisya saking kecamatan Manggis padem ngulah pati saantukan marebat sareng reramanne TribunBali, 17 Maret 2024 . Makehnyane kasus sisya ngulah pati niki, nyihnayang para yowana Bali wenten pikobet sane kabaos darurat kesehatan mental.
Kesehatan mental mabuat pisan anggen ngukuhang produktivitas miwah kesehatan angga sarira. Yening wenten pikobet ngeninin indik mental utawi manah ring para yowana, sekadi pikobet ring kabupaten Karangasem puniki, sinah pacang dados kapiambeng ring pamargin negara. Nguningin indik pikobet punika mabuat pisan, saantukan punika patut kawigunayang utsaha saking sakancan para kramane. Yadiastun Guru wisesa sampun ngalaksanayang utsaha, nanging para yowana taler patut nyarengin megatang rantai pikobet punika. Para yowana sane urati indik pikobet sosial, dados nyarengin pinaka konselor sebaya mangda prasida ngajahin tur ngicen motivasi yowana sane tiosan.
Enable comment auto-refresher