Yening jagi maosang indik panegara Indonesia pastika nenten prasida pasahang ring kawentenan akehnyane suku, adat, budaya miwah agama. Yadiastun sekadi punika iraga dados wangsa Indonesia patut ngupapira ketreptian pataraning umat agama. Mangda wangsa Indonesiane prasida rumaket tur ngulati sekadi napi sane munggah ring Pancasila inggih punika Bhineka Tunggal Ika . Ketreptian kahuripan maagama inggih punika kahanan rikala patraning umat beragama sane mabinayan prasida saling asihin. Indika punika prasida kamargiang ngawit ring kahuripan kaluarga. Sang sane dados rerama utawi aji biang patut ngicenin panuntun ring pianak utawi okannyane mangda setata numbuhang rasa saling asah asih lan asuh nenten ja sesamen suku, adat, budaya, miwah agama manten. Nanging patut saling asihin ring warga sane maagama lianan. Nglantur raris ring weidangan sekolah mangdane para guru taler micayang indik pangajah ajah ngupapira katreptian patraning umat beragama. Raris lianan ring punika pemerintah sane dados sang maraga guru wisesa mangda nenten surud - surud micayang panuntun indik ngupapira rasa masikian dados wangsa Indonesia. Punika taler ring parajanae sami mangda eling ring dewek soang soang indik pabuat ngupapira katreptian iraga maurip ring panegara Indonesia puniki. Yening nenten wenten iraga sane pinaka warga Indonesia sira malih sane pacang kayun ngrajegan panegara Indonesia durene puniki?. Cutetnyane ngupapira sane kabaos kerukunan antarumat beragama wantah swadarman iraga makasami dados warga panegara Indonesia. Punika prasida kamargiang yening iraga setata mautsaha saking kahuripan makaluarga, ring wewidangan sekolah, kampus, parajana miwah sang maraga guru wisesa. Yening sampun makasami sareng sareng nyikiang pikayun ngupapira katreptian patraning umat beragama pastika pacang prasida ngulati panegara Indonesia sane sukerta santi tur ajeg.
Enable comment auto-refresher